VIKEKE, 14 marsu 2025 (TATOLI)—Prezidente Autoridade munisípiu (PAM) Vikeke, Francisco Cruz Simões de Gonzaga Soares, inaugura postu saúde, suku Loihunu, postu administrativu Ossú no entrega xeve ba pesoál saúde sira hodi utiliza.
“Tanba iha parte suku no postu balun ema halerik projetu husik hela, la finaliza materiál hanesan sementu sai fatuk, ida-ne’e ita bele dehan katak impedementu mai husi ita-nia autoridade sira nomós ita-nia komunidade lakohi kolabora. Tanba ne’e, atu dehan dezenvolvimentu mai labele taka ka impede. Nune’e, atu fó hanoin fila fali katak dezenvolvimentu kuandu mai ita kolabora servisu para lori dezenvolvimentu to’o iha ita-nia inan-aman sira-ne’ebé presiza duni dezenvolvimentu,” PAM Vikeke ne’e hateten iha serimónia inaugurasaun postu saúde Loihunu, kinta (13/03).
Nia dehan, dezenvolvimentu la’o mak grupu balun privatiza dezenvolvimentu ne’e sai problema, bainhira materiál sira hanesan sementu sai fatuk, ida-ne’e labele fó sala ba ema ida.
“Tanba ema fó ona kondisaun, ita mak halo jestaun oinsá obra bele la’o. Tan ne’e, ha’u fó parabéns ba xefe suku Loihunu no povu Loihunu ne’ebé servisu hamutuk hodi finaliza obra reabilitasaun postu saúde Loihunu. Reabilita postu saúde ne’e halo para ita-nia inan feton, alin, oan sira no inan-aman sira-ne’ebé la konsege hala’o to’o iha Vikeke, sira bele konsulta iha postu saúde ida-ne’e,” nia dehan.
Ho nune’e, nia husu komunidade iha munisípiu Vikeke labele impede dezenvolvimentu, tenke fó kontribuisaun ba prosesu dezenvolvimentu hodi halo mudansa ba munisípiu ida-ne’e.
Diretór Servisu Saúde Munisípiu Vikeke, Aljacsono S. Maia, husu autoridsde lokál sira nafatin servisu hamutuk ho servisu saúde sira hodi fó prioridade ba setór saúde iha munisípiu Vikeke.
“Ha’u hanoin ba konstrusaun postu saúde Loihunu ne’e ita hotu nain. Nune’e, ha’u husu komunidade kuidadu postu saúde ida-ne’e, tanba ami fó asisténsia tékniku saúde hodi fó atendementu dignu ba ita-nia komunidade,” nia hateten.
Diretór Programa Nasionál Dezenvolvimentu Suku (PNDS) munisípiu Vikeke, Francisco Soares Varela, hateten reablitasaun ba postu saúde suku Loihunu ne’e prioridade mai husi autoridade suku Loihunu sira mak deside hamutuk hodi tau PNDS.
“Obra fíziku postu saúde fínaliza ona. Obra ne’e nesesidade komunidade nian, nune’e konsellu suku tau ba programa prioridade hodi halo reabilitasaun postu ida-ne’e no ohin ita halo inaugurasaun obra referidu,” nia dehan.
Ba konstrusaun no reabilitasaun postu saúde Loihunu faze II sikulu VI orssamentu 2024 husi PNDS hamutuk $35.000,00 no hahú halo konstrusaun iha fulan-Setembru 2024 no finaliza iha Marsu 2025.
Xefe suku Luihuno, Filomeno Guterres, hato’o agradesimentu ba PNDS ne’ebé halo reabilitasaun ba postu saúde suku Loihunu nian, hodi fó atendementu saúde ba komunidade iha suku ne’e.
“Ba reabilitasaun postu saúde ida-ne’e, orsamentu husi PNDS, ami la hetan fundu husi fatin seluk. Tan ne’e, ha’u husu agrasede ba PNDS ne’ebé reabilita ami-nia postu saúde, ida-ne’e sufisiente ona fó atendementu ba ami-nia komunidade iha suku Loihunu,” nia hateten.
Tuir dadús populasaun suku Loihunu totál hamutuk na’in-2.423 mak durante ne’e asesu bá postu saúde Loihunu.
Partisipa iha serimónia inaugurasaun postu saúde Loihunu ne’e husi autoridade postu, komadante Polísia Nasionál Timor Leste (PNTL) eskuadra Ossú, pesoal saúde no komunidade postu Ossú.
Jornalista: Vitorino Lopes da Costa
Editór : Cancio Ximenes
