ATAÚRU, 14 marsu 2025 (TATOLI) – Iha sesta ne’e, Primeiru-Ministru Kay Rala Xanana Gusmão inaugura balkaun únika iha Zona Ekonómika Espesiál Atáuru hodi lori sistema dijitalizasaun hodi atende komunidade sira ba iha interesse lejítimu iha identidade pesoál.
Xefe Governu husu ba Autoridade Lokál sira atu fó atendimentu ba komunidade sira tuir sira-nia papél.
“Sistema ne’e mós sei hatudu transparénsia iha programa sira nune’e husu ba autoridade lokál sira atu fó atendimentu ba komunidade sira no felisita komunidade sira hodi asesu ba programa ne’e’’, Xanana Gusmão dehan, iha ámbitu inaugurasaun ne’e, ohin.
Enkuantu, Ministru Justisa hateten, iha nia diskursu, sistema ne’e sei faslita dokumentu komunidade nian no kontribui ba administrasaun rejistu nian liuhosi halo dezenvolvimentu hodi fó seguransa jurídika iha rejistu nian hodi iha dadus ne’ebé konsolidadu husi munisípiu ida ba munisípiu seluk to’o iha nível suku hodi halo planifikasaun di’ak iha setór saúde, edukasaun no área seluk ne’ebé povu presiza.
“Balkaun únika ne’e sei fasilita komunidade iha trata ba dokumentu identidade pesoál hanesan passaporte, sertidaun moris, rejistu guia óbitu no rejistu ba sertidaun seluk hanesan lisensa ba negósiu,” Sergio Hornai hateten.
Tuirmai, Ministru Administrasaun Estatál, Tomás Cabral, reforsa, “Lansamentu balkaun únika ne’e sei fasilita komunidade sira hodi trata dokumentu pesoál no la presiza to’o iha kapitál hodi trata dokumentu sira”.
Governu agradese ba ajénsia internasionál hanesan PNUD, Uniaun Europeia ba vizaun dezenvolvimentu nian no parseiru dezenvolvimentu seluk ba parseria ne’ebé fó hodi realiza programa ne’e no husu ba autoridade lokál sira hodi tau atensaun ba fasilidade ne’ebé iha hodi dura to’o tempu-naruk.
Jornalista : Joanico de Araújo
Editór: Rafael Ximenes de A. Belo
