ATAÚRU, 14 marsu 2025 (TATOLI) – Iha vizita ba AtáurU, Ministru Administrasaun Estatál apresia, ho projetu ne’ebé implementa husi Fundu Espesiál Dezenvolvimentu Atáuro (FEDA) ba estrada iha Makadade ne’ebé konekta ba kapitál Ataúru no hatudu kondisaun suku kapaas ho administrasaun ne’ebé hetan apoiu másimu husi komunidade.
“Estrada ne’ebé loke bele halo ligasaun servisu ba kapitál no papel FEDA nian hodi serbisu makaas ho autoridade lori Governu besik besik ba komunidade no kontinua tau orsamentu hodi kompleta estrada kilómetru 15 tan nune’e komunidade sira labele sente izoladu, ” Tomás Cabral hateten, durante vizita iha Ataúru.
Membru Governu ne’e mós louva ho autoridade lokál, parte seguransa no komunidade sira ne’ebé kontribui makaas ba dezenvolvimentu iha Ataúru no husu nafatin atu mantein jestu ne’e nune’e bele atinji kumpromisu polítika IX Governu konstitusionál.
Iha tempu hanesan, Xefe Suku Makadade apresia ho polítika Governu nian hodi hakotu izolamentu iha Atáuro tanba iha tinan barak komunidade sira moris iha kondisaun estrada ne’ebé grave tebes.
“Nu’udar autoridade lokál sente onradu ba Governu ne’ebé aprova orsamentu ba estrada Beloi-Makadade to’o iha aldeia sira nune’e ajuda komunidade sira ne’ebé maioria moris ho vida agrikultór bele lori sira-nia produtu asesu ba merkadu’’, Xefe Suku Makadade, Jeremias Alves informa.
Orsamentu FEDA ba tinan 2025 ho totál orsamentu miliaun ruano projetu sira ne’e hala’o iha Ataúru mak hanesan, hadi’a estrada, eskola, no edifísiu balkaun úniku.
Jornalista: Joanico de Araújo
Editór: Rafael Ximenes de A. Belo
