DÍLI, 14 Jullu 2026 (TATOLI) – Asosiasaun Defisiénsia Timor-Leste (ADTL) husu ba Governu atu revê montante subsídiu ba Ema ho Defisiénsia (EhD), hodi garante katak pagamentu subsídiu bazeia ba kondisaun no grau defisiénsia idak-idak.
Diretór Ezekutivu ADTL, Cesário da Silva, hateten katak EhD iha kondisaun no nesesidade ne’ebé la hanesan. Tanba ne’e, Governu presiza konsidera diferensa hirak-ne’e bainhira determina montante subsídiu.
“Subsídiu ba Ema ho Defisiénsia tenke bazeia ba nesesidade espesífika. Labele trata sira hanesan ho grupu seluk, tanba balu iha defisiénsia ida de’it, maibé balu seluk iha defisiénsia rua ka liu, hanesan defisiénsia vizuál no fízika iha tempu hanesan. Kondisaun hanesan ne’e halo sira depende ba ema seluk atu ajuda iha moris loroloron. Tanba ne’e, montante subsídiu tenke la hanesan,” dehan Cesário ba TATOLI, iha nia knaar-fatin iha Mascarenhas, Díli, ohin.
Nia esplika katak EhD balun sei bele servisu no sustenta an rasik, maibé balu seluk labele servisu tanba kondisaun saúde no tenke depende ba apoiu husi membru família. Tanba ne’e, nia husu Ministériu Solidariedade Sosiál no Inkluzaun (MSSI) atu halo avaliasaun kle’an ba kondisaun benefisiáriu sira antes determina montante subsídiu.
ADTL observa katak atualmente benefisiáriu EhD hotu simu subsídiu US$60 kada fulan. Maibé, organizasaun ne’e konsidera katak sistema ida-ne’e seidauk reflete diferensa iha grau defisiénsia no nesesidade ema ida-idak.
“Ema balu iha defisiénsia grave ka defisiénsia múltipla, ne’ebé presiza asisténsia permanente. Tuir ami nia haree, sira ne’e tenke hetan subsídiu aas liu duké US$60 kada fulan,” dehan nia.
Cesário mos hateten katak Governu aplika ona sistema diferensiadu ba subsídiu idozu no idoza. Tuir sistema ne’e, benefisiáriu ho idade entre tinan 70 no 79 simu US$80 kada fulan, no sira ne’ebé idade 80 ba leten simu US$100 kada fulan.
Nia husu MSSI atu konsidera mekanizmu hanesan ba EhD, liuhosi klasifika benefisiáriu sira tuir grau defisiénsia no nesesidade, atu sira bele moris ho dignidade no hetan apoiu ne’ebé adekuadu.
“Tamba ne’e, ami husu ba MSSI atu revê fila fali polítika subsídiu ba Ema ho Defisiénsia, atu montante ne’ebé fó bazeia duni ba nesesidade espesífika no kondisaun ida-idak, hodi garante sira bele moris ho dignidade hanesan sidadaun seluk iha Timor-Leste,” nia reiteira.
Jornalista: Camilio de Sousa
Editór: Filomeno Martins
