KOVALIMA, 15 Marsu 2025 (TATOLI)—Eis funsionáriu United Nations Mission in East Timor (UNAMET), sábadu ne’e, halibur malu hala’o konferénsia munisipál ba dahuluk hodi rekomenda pontu neen ba Governu.
Atividade konferénsia munisipál dahuluk ne’ebé organiza husi eis funsionáriu UNAMET ho nia tema “Hahú no Hametin Dezenvolvimentu ba Kovalima ne’ebé sustentável”.
Prezidente Komisaun Organizadora, Alberto Moniz de Araújo, esplika katak pontu neen referidu mak hanesan fó oportunidade tratamentu saúde ba eis funsionáriu ho nia oan sira, fó oportunidade ba eis funsionáriu nia oan asesu bolsa estudu, iha oportunidade atu bá servisu iha rai-li’ur sira, Governu presiza konsidera eis funsionáriu ne’ebé iha kapasidade promove servisu sai funsionáriu públiku no envolve iha Konsellu Konsultivu Munisipál no konsidera eis funsionáriu UNAMET bainhira komemora Loron Konsulta Populár, 30 Agustu 1999.
“Governu presiza konsidera ami eis funsionáriu UNAMET sira maski ami-nia envolvimentu sai poling staff semana ida liu hodi servisu hanesan tradutór, motorista no seluk tan,” Alberto dehan ba jornalisra sira, iha salaun Administrasaun Munisipál Kovalima, Suai.
Razaun eis funsionáriu UNAMET organiza konferénsia munisipál tanba durante ne’e Governu la konsidera eis funsionáriu referidu liuhusi atividade loron nasionál hanesan Loron Konsulta Populár no loron-boot sira seluk.
Alberto esplika katak atividade konferénsia munisipál bainhira to’o iha kongresu nasionál sei rejistadu sai hanesan organizasaun.
Tuir dadus, eis funsionáriu UNAMET iha Timor-Leste hamutuk 3.900-resin. Husi númeru ne’e, eis funsionáriu UNAMET husi Kovalima hamutuk 341 kompostu husi interpreter, motorista, security, cleanear no mós poling staff sira.
Entretantu, Prezidente Konsellu Munisipál Kombatente Libertasaun Nasionál, Osório Soares “Mausoko” fó hanoin ba eis funsionáriu UNAMET katak la’ós de’it eis funsionáriu UNAMET mak merese hetan rekoñesimentu maibé presiza konsidera mós estrutura rezisténsia hanesan sekretáriu zona sira.
Jornalista: Celestina Teles
Editór: Xisto Freitas da Piedade
