DLI, 15 Marsu 2025 (TATOLI)—Diretór Operasionál Klínika Flodova, Florindo Cardoso, rejeita totalmente deklarasaun família matebian António do Rosário ne’ebé dehan prosesu diagnóstiku entre ospitál Siloam Kupang no Klínika Flodova ba matebian nia moras lahanesan.
Tuir nia katak rezultadu diagnóstiku husi Fladova la sees husi rezultadu finál ospitál Siloam Kupang, Nusa Tenggara Timur, Indónezia.
“Diagnóstiku ne’ebé doutór espesialista referida halo la sees husi diagnóstiku finál ne’ebé mak mai husi ospitál Siloam Kupang. Ospitál Siloam Kupang tenke halo teste kumprimentária bazeia ba karta referrál ne’ebé mai husi Klínika Flodova. Karta transfere no rezultadu entra ospitál Flodova no ospitál Siloam Kupang, ami rai iha-ne’e hodi sai faktu,” nia dehan ba jornalista sira iha Hudi-Laran, Dili, sábadu ne’e, liuhusi konferénsia ba imprensa relasiona ho família matebian ho naran Cipriano do Rosário Pereira deklara katak rezultadu diagnóstika entre ospitál Siloam Kupang no Klínika Flodova lahanesan.
Florindo klarifika katak matebian la’ós hakotu-iis iha Klínika Flodova tanba bainhira fila husi ospitál Siloam Kupang, pasiente kontinua halo tratamentu fali iha HNGV no hakotu-iis iha loron 26 Janeiru 2025.
Entretantu, kliníka privadu ne’e mós rejeita katak matebian halo tratamentu iha Klínika Flodova gasta osan ho montante $8.093.00, tanba sistema hatudu montante oin seluk.
Iha fatin hanesan, Advogadu Klínika Fladova, Olívio Barros Afonso, konsidera katak matebian nia kondisaun grave ona antes halo tratamentu iha klínika ne’e.
“Iha inísiu kedas pasiente ne’e grave ona,” advogadu deklara ba jornalista sira liuhusi konferénsia ba imprensa.
Antes pasiente ne’e halo tratamentu iha Klínika Fladova, nia dehan, halo ona tratamentu iha Hospital Nacional Guido Valadares (HNGV) no klínika privada seluk tan maizumenus fulan ida nia laran.
Tan ne’e, nia esplika, ekipa médika sujere atu nafatin halo tratamentu iha HNGV hodi hetan tratamentu ne’ebé mak di’ak, maibé pasiente rejeita no hakarak halo tratamentu iha klínika privada ne’e.
“Médiku espesialista responsável iha-ne’e sujere atu pasiente bá HNGV atu kontinua halo tratamentu iha-ne’ebá hodi hetan tratamentu ne’ebé mak di’ak, maibé pasiente rasik rejeita no hakarak halo tratamentu iha Klínika Flodova,” Olívio tenik.
Nia hateten ekipa médika sempre prepara karta aseitasaun ba pasiente no ninia família sira tuir prosedimentu no mós halo esplikasaun antes halo tratamentu, nune’e bele konsidera iha asaun akordu entre klínika no pasiente sira.
“Médiku espesialista responsável prepara tiha karta konxientimentu iha formuláriu ida hodi husu nia deklara ho konxiénsia. Nia rasik deklara katak nia mak hakarak atu mai halo nia tratamentu iha-ne’e. Ami-nia ekipa mós sempre halo esplikasaun kona-ba prosedimentu tratamentu sira iha-ne’e ba pasiente antes kontinua ba faze tratamentu,” advogadu ne’e haktuir tan.
Nia salienta katak iha momentu ne’ebá mós médiku sira halo kedas atendimentu primária ba pasiente hanesan amnésia, teste laboratóriu, teste X-Ray no Ultrassonografia (USG) hodi identifika pasiente nia moras, no bazeia ba teste hirak-ne’e ekipa médika suspeita rezultadu katak pasiente afeta moras oin-tolu.
“Hafoin rezultadu fó-sai suspeita katak pasiente enfrenta moras oin-rua ka tolu, maibé deskulpa ami labele fó sai informasaun detalla kona-ba moras, tanba ne’e la autoriza iha étika médika,” nia deklara.
Antes ne’e, família matebian António do Rosário, liuhusi portavóz Cipriano do Rosário Pereira deklara katak matebian halo tratamentu ho osan hamutuk $8.093.00 iha klínika referida maibé laiha mudansa ba saúde, nune’e sira foti desizaun lori pasiente bá halo tratamentu iha ospitál Siloam Kupang, no deklara katak rezultadu diagnóstika lahanesan ho Klínika Flodova nian.
“Ami família matebian sente vítima ba atu atendimentu iha Klínika Flodova tanba la fó informasaun klaru kona-ba diagnóstika no kustu totál tratamentu durante loron lima iha Flodova hamutuk $8.093.00 maibé laiha balansu atu rekupera,” Cipriano hateten.
Jornalista: Alexandra da Costa
Editór: Xisto Freitas da Piedade
