DILI, 15 Marsu 2025 (TATOLI)—Uniaun Profisionál Saúde Partidu Demokrátiku (UPS-PD), sábadu ne’e, iha salaun CNE, Kaikoli, realiza semináriu nasionál ho tema “Hametin ezisténsia UPS-PD hodi serbisu ho kualidade no integridade”.
Objetivu husi semináriu ne’e, Prezidente Partidu Demokrátiku, Mariano Assanami Sabino, hateten atu konsolida responsabilidade nu’udár ema PD ne’ebé estuda no aprende iha área saúde atu salva ema, tanba PD harii kontribui prinsípiu kontinuidade espirítu lutadór sira-nian.
“Apresia esforsu no parabéns tanba ita bele túr hamutuk oinsá mak halo re-integrasaun espíritu Partidu Demokrátiku,” Assanami hato’o hanoin ne’e liuhusi nia intervensaun bainhira halo abertura ba semináru referidu.
Nia konsidera semináriu ne’e importante tanba oradór sira sei aprezenta vizaun no ezisténsia partidu no matéria jestaun instituisionál ho seluk tan hodi reforsa responsabilidade hodi fó prestasaun serbisu saúde di’akliu ba povu iha loron-loron.
“Destinu iha Maromak nia liman, maibé ita-nia mandatu salva ema ne’e mak importante. Pasiente ida hetan médiku ida, nia sente ema salva nia. Psikolojikamente nia hetan ona katak nia bele di’ak,” nia hatutan.
Tuir atuál Vise Primeiru-Ministru asuntu Sosiál ne’e, importante tebes pilár sira iha área saúde atu fó atendimentu ho di’ak liután ba povu mak hanesan médiku ho teknolojia, infraestrutura tenke di’ak.
Pilár seluk mak kuadru legál ho padronizasaun iha ospitál, lideransa no jestaun, komunikasaun, dijitalizasaun sistema, rekursu umanu, konsolida forsa, jestaun medikamentu no prestasaun atendimentu pasiente.
Iha fatin hanesan, Koordenadór Jerál UPS-PD, Herculano Seixas dos Santos, hateten ezisténsia organizasaun hahú iha loron 23 Novembru 2022, maski ho otas foun maibé mai ho mehi boot atu kontribui haboot PD no fó kontinuidade ba misaun libertasaun povu liuhusi setór saúde.
Organizasaun ne’e mai ho nia ideolojia mak: ‘Profisionalizmu, Nasionalizmu, Umanizmu, Fraternidade no Solidariedade no vizaun mak timoroan hotu iha oportunidade hanesan ba moris saudável, livre husi estigma ka deskriminasaun’.
Organizasaun antes ne’e iha membru 500 no iha semináriu nasionál ne’e membru foun balun simu mós pose, nune’e atuál membru hamutuk 900-resin mai husi territóriu laran.
Koodenadór Jerál ne’e hatutan eventu ohin ho tema ne’ebé iha reafirma ezisténsia organizasaun. “Kualidade ne’e konseitu ida multidimensionál. Kualidade iha ita-nia hanoin, ita-nia programa sira, kualidade iha polítika, jestaun no prestasaun servisu ba komunidade, integridade, serbí ho onestidade no senseridade, kaer metin prinsípiu igualdade no ekuidade, tane aas étika profisionál no kumpri responsabilidade profisionál ne’ebé iha hodi defende interese komún povu no nasaun,” nia subliña.
Oradór sira sei aprezenta filozofia PD no vizaun ba futuru, hametin jestaun organizasionál ho valór demokrasia no sentidu Estadu, ezisténsia vizaun no misaun UPS-PD.
“Tema tolu ne’e pertinente tebes atu forma karater profisionál saúde demokrátiku nian ne’ebé sei marka diferensa iha ita-nia maneira hanoin no asaun hodi serbí ba umanidade,” médiku espesialista ba kardiolojia ne’e tenik.
Jornalista: Nelson de Sousa
Editór: Xisto Freitas da Piedade
