MANUFAHI, 15 Marsu 2025 (TATOLI)—Sekretáriu Estadu Komunikasaun Sosiál, Expedito Loro Dias Ximenes, husu ba jestór Rádiu Lian Proklamadór Turiskai atu fó prioridade ba kobertura atividade sosiál sira duké atividade ajendamentu.
“Imi halo kobertura karik se bele barak liu halo bá atividade agrikultór sira-nian iha área rurál duké bá atividade serimoniál sira tanba rádiu komunidade ne’e rádiu ne’ebé komunidade nian,” Expedito Dias hateten liuhusi nia intervensaun bainhira hala’o vizita ba Rádiu Komunidade Lian Proklamadór iha Turiskai, Munisípiu Manufahi, sábadu ne’e.
Governante ne’e apresia ba kondisaun fasilidade ne’ebé mak Rádiu Komunidade Lian Proklamadór iha, kompara ho rádiu komunidade sira seluk.
“Ha’u husu ita-boot sira, bá-oin nafatin transmite lian Saudozu Proklamadór Francisco Xavier do Amaral nu’udár Turiskai-oan. Ha’u sente orgullu tanba imi hili títulu proklamadór prega ba rádiu komunidade iha Turiskai sai Rádiu Komunidade Lian Proklamadór,” nia hateten.
Expedito promete katak hafoin vizita rádiu referidu, bá-oin nia sei haree hodi rezolve difikuldade balun ne’ebé rádiu ne’e enfrenta, nune’e rádiu ne’e bele halo nia servisu hodi serbí komunidade ho di’ak liután.
Iha fatin hanesan, Prezidente Konsellu Rádiu Komunidade Lian Proklamadór, Joni dos Reis, hateten iha Rádiu Komunidade Lian Proklamadór iha komputadór rua no funsionáriu na’in hitu inklui estudante voluntáriu sira.
Nia dehan, Rádiu Komunidade Lian Proklamadór durante ne’e halo kobertura to’o bá área remota, bá fatin ne’ebé rede la eziste, entaun ekipa entrevistadór grava tiha iha fatin entrevista hafoin transmite.
Joni hatutan, Rádiu Lian Proklamadór sei kontinua halo kobertura ba atividade sosiál liuliu oinsá esplora setór agrikultura tanba iha Turiskai ne’e setór ida-ne’ebé potensiál mak agrikultura basá kafé iha Turiskai ne’e persentajen boot.
Nia haktuir Rádiu Lian Proklamadór enfrenta problema mak dalaruma ahi mate loron ida dala rua to’o dala tolu afeta bá fasilidade rádiu nian.
Rekorda fali katak Rádiu Komunidade Lian Proklamadór ho frekuénsia 99.4 Mhz ne’e hetan inaugurasaun husi Ministru Asuntu Parlamentár no Komunikasaun Sosiál, Francisco Jerónimo, iha 12 Fevereiru 2022.
Jornalista: Natalino Costa
Editór: Xisto Freitas da Piedade
