DILI, 17 Marsu 2025 (TATOLI)—Sekretáriu Estadu Komunikasaun Sosiál, Expedito Loro Dias Ximenes, husu ba diretór informasaun mídia estatál, mídia konvensionál inklui mídia plataforma dijitál atu destaka jornalista seniór ba órgaun soberanu tolu hanesan Palásiu Prezidente, Palásiu Governu no Parlamentu Nasionál nune’e bele halo kobertura ho di’ak.
¨Ohin halo enkontru ho diretór informasaun, xefe redasaun ho editór seniór sira husi mídia konvensionál, mídia plataforma dijitál sira-ne’ebé durante ne’e halo sira-nia servisu iha ita-nia rai. Ohin ha’u hato’o pontu rua. Primeiru, ha’u ko’alia kona-ba oinsá mak jornalista sira-ne’ebé destakadu iha Palásiu Prezidente, jornalista ne’ebé iha Palásiu Governu, jornalista ne’ebé iha Parlamentu Nasionál se bele jornalista ne’ebé seniór. Segundu, jornalista ne’ebé ho aprezentasaun di’ak. Labele ba iha Palásiu Governu, Palásiu Prezidente no Parlamentu Nasionál jornalista ida ho fali kamizola, ne’e labele,” Expedito hateten ba jornalista sira hafoin enkontru ho dirijente mídia sira iha Palácio do Governo, segunda ne’e.
Ba kestaun ne’e, nia haktuir, dirijente mídia sira konkorda, sira sei haree ida-ne’e hodi hadi’a iha futuru.
Tuir governante katak jornalista sira tenke iha kapasidade atubele analiza, labele jornalista ida halo gravasaun depois fila mai halo transkrisaun, depois fó-sai.
“Jornalista ida tenke iha kapasidade halo analiza bainhira nia halo entrevista ho entidade ida. Bainhira la halo analiza mak ema dúvida ba ita-nia notísia. Tanba ne’e mak ohin ami hasoru malu ida-ne’e atubele fó hanoin ba kestaun sira-ne’e,” nia esplika.
Expedito Loro observa katak servisu jornalista sira durante ne’e di’ak ona maibé presiza hadi’a liután entermu iha kualidade produtu jornalístiku sira tanba notísia sira durante ne’e laduun kompletu, tanba tuir regra presiza check, recheck & crocheck informasaun ne’ebé rekollida molok halo publikasaun.
Iha biban ne’e, governante ne’e husu ba dirinjente mídia sira hotu atu estabelese Konsellu Redasaun iha idak-idak nia mídia, tanba ne’e importante tebes atu evita interferénsia husi podér polítiku no podér ekonómiku.
“Ohin mídia hotu-hotu hateten katak sira iha ona Konsellu Redasaun. Ha’u sente haksolok tanba Konsellu Redasaun ne’e importante tebes, tanba ne’e konsagra iha mandatu Lei Komunikasaun Sosiál,” Expedito tenik.
Jornalista: Natalino Costa
Editór: Xisto Freitas da Piedade
