KOVALIMA, 17 Marsu 2025 (TATOLI)- Konstrusaun Uma Naroman ba Povu (UNP) plus A ne’ebé implementa iha Postu administrativu Maukatar, Suku Ogues aldeia Orun, seidauk finaliza konstrusaun ho razaun tanba disputa rai.
Administradór postu administrativu Maukatar, Laurentino de Jesus, dehan, implementasaun Uma Naroman ba Povu (UNP) Plus + A iha Maukatar hamutuk unidade 75, to’o ohin loron idaseidauk finaliza nia konstrusaun tanba disputa rai.
“Konstrusaun UNP Plus+ A to’o daudaun ne’e seidauk finaliza konstrusaun, tanba hahú konstrusaun la iha problema antes konstrui identifika rai loos ona mak konstrui maibé hafoin troka administradór mosu problema uitoan ami mós konsege halo ona levatanmente ba Tribunál”, Laurentino de Jesus, informa ba TATOLI iha AMC, ohin.
Autoridade postu ne’e mós dehan, iha prosesu halo levantamentu, nia rezultadu, Tribunál dehan labele halo buat ruma, tanba seidauk iha krime nune’e kontinua atu halo konstrusaun.
Solusaun mak badaen sira kontinua halo konstrusaun bainhira iha ema balun halo asaun tanba problema família; molok iha administradór sesante nia tempu aseita mak halo konstrusuan maibé ikus mai mosu disputa rai.
Bazeia regra, molok atu konstrui UNP kritéria identifika uluk rai la iha disputa foin hala’o konstrusaun UNP maibé prosesu konstruisaun hahú to’o ona iha faze tíjolu (batako) mosu fali problema disputa rai tanba ne’e mak to’o ohin loron seidauk finaliza konstrusaun.
“Atu kontinua konstrusaun ita presiza konvoka fali reuniaun ho PNDS atu halo identifikasaun rai ne’e Tribunál entrega mai kontinua ona konstruisaun. Ami bolu malu ona no xefe suku atuál submete ona karta ba Tribunál, maibé Tribunál labele rezolve tanba momentu mai la’ós krime nune’e ami labele foti desizaun”, nia dehan.
Ho nune’e autoridade postu ne’e argumenta, presiza kontinua tanba konstrusaun UNP plus + A nia orsamentu mai husi orsamentu Jerál Estadu (OJE) nune’e konstrusaun daudaun ne’e atinji ona 30% nune’e autoridade hein tékniku PNDS atu kontinua.
Diretór PNDS, Pedro de Araújo Gomes klarfika, prosesu konstruisaun UNP plus A unidade 74 mak finaliza ona falta UNP unidade ida mak seidauk finaliza, tanba hasoru problema disputa rai.
“Ita atu rezolve liuhusi mediasaun atu halo mediasaun ne’e ita entrega ba lideransa komunitária ne’ebé hala’o ona enkontru hetan ona solusaun maibé badaen sira mak la brani atu kontinua obra”, nia klarifika.
UNP plus A unidade ida seidauk finaliza tanba disputa rai, nia orsamentu ne’ebé daudaun labele uza tenke fó fila ba kofre Estadu.
Prosesu konstrusaun tama ona iha hada tíjolu rihun $ 6 nune’e osan balansu rihun $ 7 liu fila ba kofre Estadu.
Jornalista:Celestina Teles
Editór: Rafael Ximenes de A. Belo
