SMOP Vikeke rejista ponte Metauai no Sumaku hetan estragu
VIKEKE, 17 Marsu 2025 (TATOLI)—Diretór servisu Obra Públika (SMOP) munisípiu Vikeke, Casildo Gomes, informa udan boot ne’ebé akontese iha fulan-Janeiru to’o Marsu ne’e, SMOP munisípiu Vikeke rejista ponte Metauai no ponte Sumaku hetan estragu husi bee mota.
“Durante akontese udan boot mosu inundasaun iha munisípiu Vikeke afeta ba ita-nia ponte rua mak kotu, hanesan ponte Metauai baliza entre Uatucarbau no Uatulari no ponte Sumaku lokaliza iha suku Uma Tolu, postu Lakluta inklui estrada balun kotu. Maibé, ita konsege normaliza hotu tanba ita hetan apoia husi Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADI, I.P),” Casildo Gomes hateten ba Agência Tatoli iha nia kna’ar fatin Beloi, ohin.
Nia dehan, bainhira ponte no estrada sira hetan inundasaun kotu SMOP kontaktu imediata ba IGEADI, I.P hodi halo normalizasaun ba ponte no estrada sira iha munisípiu Vikeke.
“Daudaun ne’e, estrda parte Osobia liga ba postu Uatulari, atu besik kotu tán. Ne’ebé, ha’u orienta ona tékniku SMOP Vikeke ba foti dadús estrada nian, hodi relata ba nasionál oinsá bele haree estrada Osobia ne’ebé besik kotu,” nia dehan.
Nia dehan, estrada Osobia SMOP sei tau ba atensaun tanba estrada referida kotu sei difikulta ba movimentu Uatucarbau, Uatulari no Vikeke.
“Tan ne’e, ita hein tékniku rekolla hotu dadus, ha’u sei haruka ba nasionál hodi revolve estrada referida, atu labele difikulta movimentu sira,” nia dehan.
Aleinde ne’e, nia dehan, tempu badak vise Ministru Obra Públika sei mai vizita munisípiu Vikeke hodi haree direta estrada sira no projetu sira-ne’ebé implementa iha munisípiu Vikeke.
“Iha tempu badak, ita-nia vise MOP sei mai vizita munisípiu Vikeke, hodi la’o tuir projetu estrada sira-ne’ebé implementa iha Vikeke,” nia dehan.
Jornalista : Vitorino Lopes da Costa
Editór : Cancio Ximenes
