KOVALIMA, 18 Marsu 2025 (TATOLI)–Prezidente Autoridade Munisípiu Kovalima, Miguel Armada Cardoso, hala’o enkontru ho Komisaun organizadora (KO) hodi fahe tarrefa serbisu, prepara atu simu vizita Prezidente Repúblika (PR), José Ramos Horta, ba responsavel komisaun komisaun sira. Vizita Xefe Estadu iha munisípiu ne’e, sei hala’o asaun karitativa ba família vulaneravel sira, inklui ajenda prinsipál sira seluk.
Prezidente KO, Filomeno Cardoso, informa, preparasaun atu simu vizita husi Xefe Estadu, autoridade Kovalima forma ona komisaun organizadora ho nia seksaun hamutuk 15 ho idaidak nia responsavel.
“Ita-nia prepara iha ámbitu simu vizita husi Prezidente Repúblika José Manuel Ramos Horta, ne’ebé daudaun ne’e ita-nia preparasaun kuaze finaliza”, Filomeno Cardoso dehan ba jornalista sira, iha edifísiu CNE Kovalima, Tabakolot, ohin.
Tuir ajenda ne’ebé iha Komisaun organizadora katak, Prezidente Repúblika José Ramos Horta sei vizita Kovalima iha loron 26 to’o loron 29 Marsu tinan ne’e.
Durante Xefe Estadu nia prezensa sei hala’o atividade sira hanesan hala’o asaun karitativa ba família husi postu hitu hamutuk 850 ne’ebé mai husi postu Fatululik família vulneravel 50, Fohorem 100, Fatumea 100, Maukatar 100, Tilomar 100, Suai 150 no Zumalai 200.
Xefe Estadu mós hakarak vizita konstrusaun Kapela iha Aldeia Ai-oan postu Tilomar, konvoka diálogu ho alunu sira iha Eskola sekundáriu jerál públika Suai , partisipa eventu kurrida Kavalo no futu-manu.
Tanba ne’e, autoridade Kovalima halo preparasaun no sira preparadu hodi simu vizita Xefe Estadu. Maibé, kona-ba orsamentu seidauk hatene tanba sei hein asesór husi Prezidente Repúblika.
“Ita seidauk hatene totál orsamentu simu vizita husi PR mai iha Kovalima. Ita sei hatene totál orsamentu ne’e iha loron 22 Marsu ne’e”, nia dehan.
Jornalista: Celestina Teles
Editór: Rafael Ximenes de A. Belo
