DILI, 18 Marsu 2025 (TATOLI)—Komisáriu Komisaun Antí Korrupasaun (CAC-sigla portugés), Rui Pereira dos Santos, hala’o enkontru ho akadémiku, sosiedade sivíl, reprezentante asosiasaun jornalista sira hodi haforsa CAC nia servisu ba prevensaun kombate korrupsaun bazeia ba rekizitu United Nations Convention Against Corruption(UNCAC) nian.
Komisaun Antí Korrupasaun nu’udár membru ida husi UNCAC, tanba ne’e presiza halo reuniaun ho Governu, akadémiku, sosiedade sivíl, asosiasaun jornalista sira inklui entidade sira nune’e bele fó hanoin no rekomenda ba CAC hodi haforsa servisu CAC ba prevensaun no kombate korrupasaun iha Timor-Leste no tuir rekizitu UNCAC haruka.
“Iha fulan Maiu tinan ne’e, ekipa UNCAC husi nasaun rua, Austrália no Illa Marshall, atu mai halo avaliasaun ba servisu CAC liga ba servisu prevensaun no kombate korrupsaun,” nia dehan ba jornalista sira hafoin hala’o enkontru ho sosiedade sivíl, akadémiku no reprezentante jornalista, iha salaun Diplomátiku Ministériu Negósiu Estranjeiru no Kooperasaun, Praia dos Coqueiros, tersa ne’e.
Nia esplika, lei númeru: 7/2020, 26 Agustu, kona-ba Medida Prevensaun no Kombate Korrupsaun (MPCC-sigla portugés), ne’e mós fó biban ba setór privadu sira bele konstitui sai arguidu, kuandu sira halo jestaun ba osan Estadu ne’ebé hetan apoiu liuhusi subvensaun halo nia jestaun laloos, inklui NGO sira mós hanesan, kuandu jere osan laloos lori bá iha CAC bele halo mós intervensaun no halo prosesu.
Iha fatin ketak, Diretora Ezekutiva Programa Monitorizasaun Sistema Judisiál (JSMP-sigla inglés), Ana Paula Marçal, agradese ba konvite CAC nian, hodi marka prezensa hato’o hanoin balun kona-ba implementasaun UNCAC.
“Agradese ba konvite Komisaun Antí Korrupasaun nian hodi tau hanoin hamutuk kona-ba implementasaun UNCAC nian,” nia agradese.
Ana sei fó hanoin no rekomenda kona-ba saida mak durante ne’e JSMP observa kona-ba prevene no kombate korrupsaun iha Timor-Leste ba iha kazu sira ho natureza korrupsaun.
Jornalista: Natalino Costa
Editór: Xisto Freitas da Piedade
