DILI, 18 Marsu 2025 (TATOLI)—Ministru Defeza, Kontra Almirante Donaciano Costa Gomes “Pedro Klamar Fuik”, akompañadu husi Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raul “Falur Rate Laek”, entrega ekipamentu dormitóriu ba Komponente Navál, Komponente Terreste, Komponente Aérea Lijeira inklui Unidade Polísia Militár (PM).
“Ohin ita iha serimónia entrega ekipamentu dormitóriu nian ba instutisaun F-FDTL ba Komponente Navál, Terrestre no Aérea inklui Unidade Polísia Militár. Ne’e nu’udár parte ida husi prosesu dezenvolvimentu no transformasaun instituisaun F-FDTL atu sai modernizadu no profisionalizadu,” Klamar Fuik hateten ba jornalista sira iha Kuartél Jenerál Fatuhada, Dili, tersa ne’e, hafoin entrega ekipamentu dormitóriu ba militár sira.
Nia esplika, ekipamentu dormitóriu ne’ebé ministériu entrega ba militár sira mak hanesan kama, esponza, sumasu no manta rihun-tolu.
“Ita-boot sira hatene dezastre naturál ne’ebé akontese iha loron 01 Janeiru 2025, inundasaun estraga infraestrutura Militár Komponente Navál nian iha Hera,” nia haktuir.
Governante ne’e dehan ekipamentu dormitóriu sira-ne’e ba militár sira hanesan atensaun ne’ebé Governu halo partikularmente Ministériu Defeza.
Iha Fatin hanesan, Xefe Estadu Maiór Jenerál Forsa Defeza Timor-Leste (F-FDTL), Tenente Jenerál Falur Rate Laek, hateten apoiu ekipamentu dormitóriu ba Ministériu Defeza ne’e atu moderniza no profisionaliza F-FDTL.
“Ha’u-nia agradesementu kle’an ba Ministru Defeza ho nia estrutura hotu nia apoiu mai ami F-FDTL, maski apoiu ekipamentu bele uitoan, maibé ita hakat bá beibeik nune’e ha’u husu ba komandante sira atu tau responsabilidade ba ekipamentu dormitóriu no ekipamentu sira seluk ne’ebé Ministériu Defeza fó,” nia konklui.
Jornalista: Natalino Costa
Editór: Xisto Freitas da Piedade
