DILI, 18 Marsu 2025 (TATOLI)—Diretór Servisu Apoiu Diagnóstiku no Terapéutiku iha Hospital Nacional Guido Valadares (HNGV),Vidal de Jesus Lopes, rekoñese mákina teste raan kímiku avaria iha HNGV.
“Mákina espesifikamente teste raan kímika iha laboratóriu HNGV ne’e avaria iha semana kotuk,” Vidal Lopes dehan ba jornalista sira, iha nia kna’ar fatin, HNGV, Bidau, tersa ne’e.
Nia esplika, mákina ne’e avaria tanba halo servisu oras 24 nia laran hodi atende pasiente barak.
Nia hateten, solusaun mak Laboratóriu Nasionál Saúde apoiu filafali HNGV ho provizoriamente hodi teste raan referida.
Vidal informa katak planu ba tinan ida-ne’e iha orsamentu rihun $200 atu sosa mákina foun hodi reforsa mákina ida atuál.
Mákina ne’e nia spare parts (ekipamentu) sei to’o mai iha tempu badak. Ne’e Indonézia laiha, maibé Singapura mak iha. Ekipa sira sei lori mai iha bainrua no tékniku sira sei monta kedas no bele funsiona hanesan baibain.
Antes ne’e, deputadu sira levanta asuntu ne’e iha plenária katak relasiona ho mákina ne’e avaria, parte HNGV rekomenda fali pasiente sira bá klínika DMC hodi teste raan.
“Ha’u fó ezemplu, ita-nia komunidade osan laiha, depois haruka fali bá DMC ne’e oinsá atu selu? Hanoin ospitál Estadu nian tenke iha fasilidade kompletu,” Deputadu Bankada KHUNTO, Luís Roberto, dehan iha plenária Parlamentu Nasionál, 17 Marsu 2025.
Aleinde ne’e, Deputada Bankada CNRT, Angela Maria Corvelo, haktuir semana kotuk nia-parte liuhusi HNGV iha pasiente balun ne’ebé presiza atu halo teste raan maibé hasai tiha raan haruka fali bá DMC atu halo analiza, tan ne’e husu HNGV atu solusiona lalais asuntu referidu.
Jornalista: Felicidade Ximenes
Editór: Xisto Freitas da Piedade
