BAUKAU, 18 Marsu 2025 (TATOLI)—Governu liuhosi Ministériu Administrasaun Estatál (MAE), tersa ne’e, realiza atividade konsulta orsamentu jerál Estadu (OJE) tinan-2026 ba autoridade administrasaun, postu no suku iha Munisípiu Baukau.
Vise-Ministru Administrasaun Estatál, Jacinto Rigoberto de Deus, esplika objetivu husi atividade konsulta ne’e atu rona preokupasaun husi autoridade postu no suku nune’e ajusta iha planu no tetu orsamentu ne’ebé reflete ba nesesidade komunidade iha baze.
“Liuhusi konsulta ida-ne’e mak akomoda lian sidadaun nian lori bá asaun ida konkreta mak hanaran planu asaun anuál,” Vise-Ministru Administrasaun Estatál hateten iha Sentru Konvensaun Baukau (CCB-sigla portugés), Vila Antiga, Baukau.
Governante ne’e sublinña katak Governu nia polítika ba implementasaun atividade konsulta ne’e nu’udár parte planu no asaun ne’ebé bele rezolve setór hotu hanesan edukasaun, saúde, agrikultura, estrada, ponte, eletrisidade no bee-moos.
Jacinto Rigoberto tenik atividade konsulta ba planeiamentu orsamentál kontinua hala’o iha kada tinan iha nivel munisípiu, tanba atu tetu prioridade ba kapasidade orsamentu ba tinan-2026.
“Ita tenke sukat hodi elabora planu ida-ne’e, ne’ebé justu no reflete duni ba nesesidade urjente nian,” Rigoberto akresenta.
Iha biban hanesan, Prezidente Autoridade Munisipál (PAM) Baukau, Veneranda Lemos Martins, konsidera katak atividade konsulta referida importante ba Governu Sentrál liuliu rona aspirasaun, antes halo planu asaun anuál no tetu orsamentu tinan-2026.
“Ita hakarak programa saida ba ita-nia rai, hakarak ko’alia dezenvolvimentu ba ita-nia rai, entaun liuhusi konsulta ne’e mak bele fó biban,” Veneranda hateten.
Atividade konsulta planeiamentu orsamentál tinan-2026 hetan partisipasaun husi diretór serbisu munisipál sira, autoridade postu administrativu inkluindu xefi suku 62 iha Munisípiu Baukau.
Jornalista: Natalino Belo
Editór: Xisto Freitas da Piedade
