DILI, 19 Marsu 2025 (TATOLI)-Bazea ba dadus husi Ajénsia Dezenvolvimentu Nasionál (ADN), Gabinete Apoiu Sosiedade Sívil (GASC, sigla portugés) halo observasaun no deklara katak projetu konstrusaun igreja Ai-mutin foin atinji 91,5% no sei falta 8,5% hodi finaliza.
Projetu igreja Ai-mutin ne’e hahú iha 2015, maibé agora daudaun paradu tanba ho ninia alokasaun orsamentu antes ne’e hamutuk milloes haat atus-ualu maibé Governu halo komitmentu hodi tau fali ba iha millões tolu, no rezultadu husi alokasaun ne’e ninia rezultadu mak agora.
“Relasiona ho kestaun sira ne’e mak Gabinete Apoiu Sosiedade Sívil (GASC) kontinua hela halo koordenasaun ho Konferénsia Episkopál Timorense (CET) no Dioseze Dili hodi solusiona”, Koordenadór GASC, Joaquim da Costa Freitas, hateten ba jornalista sira iha salaun enkontru GASC, Palásiu Governu, ohin.
Koordenadór GASC ne’e aumenta tan, tanba daudaun ne’e seidauk iha, sei halo hela diskusaun, atu aumenta tan montante balun hodi finaliza ka entrega ba parte dioseze, depois mak kontinua halo hotu, atu identifika obstákulu ne’ebé akontese durante prosesu konstrusaun.
“Prinsípiu informasaun sira ne’ebé mak iha ami intende ba oin seraké Governu atu hola parte montante balun tan ka projetu ida-ne’e entrega ba dioseze Dili, para depois ida-ne’e hodi finaliza igreja Aimutin”, nia hateten.
Bazea ba relatóriu, Igreja Ai-mutin, ADN sempre submete mai kada tinan, nune’e parte GASC mós informa ona ba Vise Primeiru-Ministru no dioseze hodi hatene kona-ba progresu lala’ok konstrusaun nian.
“No, agora iha kompeténsia iha Vise Primeiru-Ministru oinsá atu organiza parte sira ne’ebé envolve iha konstrusaun ne’e atu mai tuur hamutuk iha ne’e atu haree ninia efisiénsia ne’e iha ne’ebé”, dirijente ne’e informa.
Entretantu husi Gabinete Apoiu Sosiedade Sívil deklara katak, ba parte hirak ne’ebé mak envolve no kaer responsabilidade ba projetu konstrusaun igreja Ai-mutin tenki asume ninia responsabilidade no tuir informasaun katak obra konstrusaun ne’e sei esforsu hodi kontinua finaliza.
Jornalista: Alexandra da Costa
Editór : Rafael Ximenes de A. Belo
