DILI, 19 Marsu 2025 (TATOLI)—Diretór Aprovizionamentu Institutu Nasionál Farmaséutiku no Produtu Médiku (INFPM), Sergio da Costa Belo, hateten Parseiru Dezenvolvimentu Umanu (PHD-sigla inglés) husi Austrália fó apoiu silindru oksijéniu hamutuk 50 no trolleys silindru oksijéniu hamutuk unidade 50 ba INFPM.
“Horisehik (18/03), PHD entrega oksijéniu 50 hamutuk ho trolleys silindru oksijéniu 50 ba INFPM,” Diretór Aprovizionamentu INFPM ba jornalista iha nia kna’ar fatin, INFPM, Kampung Alor, kuarta ne’e.
Nia afirma, apoiu ne’e entrega husi Sekretária PHD ba Asuntu Saúde, Deidre Ballinger, ba Diretora Ezekutiva INFPM, Paulina Mendonça Maher.
“Apoiu ne’ebé hato’o seidauk fahe bá sentru saúde sira, maibé sei fahe tuir pedidu husi kada sentru saúde. Buat ne’ebé klaru mak apoiu ne’ebé fó ne’e ba servisu saúde nian,” nia hateten.
Silindru oksijéniu ne’e oras ne’e rai hela iha armazein INFPM, no sei distribui ba sentru saúde sira tuir pedidu husi sentru saúde sira-ne’ebé hato’o ba INFPM.
Jornalista: Felicidade Ximenes
Editór: Xisto Freitas da Piedade
