BAUKAU, 19 Marsu 2025 (TATOLI)—Prosesu konstrusaun ba Igreja Katedrál Dioseze Baukau tuir planu sei hala’o iha tinan ne’e bainhira finaliza ona prosesu verifikasaun husi Ministériu Obra Públika (MOP) no Ajénsia Dezenvolvimentu Nasionál (ADN).
Bispu Dioseze Baukau, Dom Leandro Maria Alves, esplika prosesu hotu relasiona ho konstrusaun Igreja Katedrál, hetan aseitasaun husi parte dioseze inklui halo aprovasaun ba Dezeñu Detalladu no Bill of Quantities (BoQ-sigla inglés) nune’e submete ona ba governu liuhosi ADN atu kontinua halo verifikasaun antes loke konkursu ba konstrusaun.
“Ita hein katak buat hotu-hotu bele la’o di’ak. Ho São José nia harohan no sarani hotu nia deseju inklui Maromak nia tulun, hein katak bele hetan rezultadu pozitivu hodi bele hahú iha tinan-ne’e,” Bispu Dioseze Baukau hateten iha Igreja Katedrál, Vila Antiga, Baukau, kuarta ne’e.
Dom Leandro argumenta katak dioseze presiza iha igreja inan ida-ne’ebé sai hanesan símbulu ba Dioseze Baukau.
Dioseze liuhosi ekipa lideradu husi Vigáriu Jerál Dioseze Baukau. Pe. Alípio Pinto Gusmão, aseita ona dezeñu no BoQ ne’ebé aprezenta husi kompañia konsultór ne’ebé akompañadu husi MOP no ADN iha loron-26 Fevereiru 2025.
Bispu Leandro lori Dioseze Baukau nia naran hato’o agradesementu ba família sarani husi Kailaki, Suku Bahú, ne’ebé ho laran luak oferese rai hodi konstrui Igreja Katedrál iha futuru.
Igreja Katedrál Dioseze Baukau rasik sei konstrui iha área Kailaki, Aldeia Ana-ulo, Suku Bahú, Postu Administrativu Baukau Vila ho ektare neen ne’ebé sei apoia orsamentu husi akordu anuál entre Governu no Igreja liuhosi Gabinete Apoia Sosiedade Sivíl (GASC-sigla portugés).
“Dioseze mak nu’udár na’in, maibé tuir regulamentu orsamentu liu montante rihun $100 ne’e tenke liuhosi prosesu tékniku sira hanesan MOP no ADN. Tan ne’e mak to’o agora ita seidauk hatene loloos kona-ba kustu tanba seidauk fó-sai,” Dom Leandro informa.
Dom Leandro enkoraja sarani sira atu moris tuir igreja bainhira prosesu konstrusaun Katedrál ramata, tanba bele fanu liután sarani sira-nia konxiénsia atu moris halibur hanesan igreja ida tuir Nai Maromak nia hakarak.
Entretantu, Dioseze Baukau harii iha loron-30 Novembru 1996 ne’ebé maktoban Dom Basílio do Nascimento mak sai Bispu dahuluk no hili São José nu’udár Mahein Dioseze Baukau.
Tuir dadus, sarani Dioseze Baukau hamutuk rihun 300-resin kompostu husi munisípiu haat hanesan Manatutu, Lautein, Vikeke no Baukau ho totál parókia 22 no rezidénsia 24.
Jornalista: Natalino Belo
Editór: Xisto Freitas da Piedade
