DILI, 19 Marsu 2025 (TATOLI)-Vise Primeiru-ministru Dezenvolvimentu Rurál no Abitasaun Komunitária, Mariano Assanami Sabino hasoru malu no halo enkontru regular ho ministra konselleru inklui ekipa dezenvolvimentu ba Timor-Leste no ASEAN, iha salaun enkontru V-PM, Palásiu Governu, tersa ne’e, hodi ko’alia kona-ba apoiu dezenvolvimentu rurál iha iha Manatutu.
Objetivu husi hasoru malu ida-ne’e atu koalia kona-ba projetu dezenvolvimentu rurál iha Manatutu ne’ebé hetan apoiu másimu husi Governu Reinu Unidu ho montante $16,5 milloes, aleinde ne’e mós ko’alia ho ajénsia internasionál sira iha área Baze Dezenvolvimentu Komunitária nutrisaun no seguransa alimentar inklui mós empoderamentu juventude.
“Ne’e apoiu ida-ne’ebé mai husi Governu Inglatera liuliu ba dezenvolvimentu rurál nian, ne’ebé maka sira mós integra hamutuk ho grand (efeitu) ADB, ne’ebé Governu UK ninia osan mós tau iha ne’ebá. Entaun osan hamutuk iha 16,5 milloes, ba atividade iha Manatutu durante tinan lima”, Vise Primeiru-ministru, Mariano Assanami Sabino, hateten ba jornalista sira iha entrevista.
Alokasaun orsamentu husi Governu Reinu Unidu ida-ne’e, atu fasilita kona-ba infranstrutura ki’ik sira iha Manatutu, tanba projetu ida-ne’e hanesan pilotu, maibé bainhira progresu la’o ho di’ak planu sei halo fali ba fatin seluktan.
“Orsamentu alokasaun ne’e ba de’it iha Manatutu, tanba ne’e hanesan grand, mas ne’e pilotu. Se Manatutu la’o di’ak mai fali ita sei halo tan ba seluk sira sei fasilita haree liu ba iha infraestrutura ki’ik sira”, governante ne’e hatutan.
Projetu infranstrutura refere liu ba bee ho sanitasaun, estrada rurál, haree mós ba irrigasaun ki’ik-oan sira, tanba nia foka liu para oinsá atu hasa’e produtividade iha ne’ebá inklui hasa’e produsaun avokate tanba iha Laklubar ne’e barak.
Iha fatin hanesan, Ministra Konselleru Dezenvolvimentu Amanda McLoughlin hateten, objetivu husi hasoru malu ida-ne’e atu serbisu hamutuk no apoiu Timor-Leste iha dezenvolvimentu rurál ba projetu iha Manatutu.
“Ami hetan konsiderasaun no akollimentu tebes husi Vise Primeiru-ministru no dala ida-ne’e ami halo diskusaun hodi apoiu ba moris, dezenvolvimentu rurál no aban ami sei halo viajen ba Manatutu no haree produtu”, Governante Reinu Unidu ne’e impresiona.
Entretantu, projetu dezenvolvimentu rurál iha munisípiu Manatutu ne’e sei hala’o kada postu administrativu sira hotu hanesan iha Laklubar, Soibada, Laleia, Lakló, Natarbora no iha Manatutu vila.
Jornalista: Alexandra da Costa
Editór: Rafael Ximenes de A. Belo
