Rejime Preskrisaun Médika proteje saúde públika

DILI, 19 Marsu 2025 (TATOLI) – Governu aprova projetu dekretu-lei kona-ba Rejime Preskrisaun Médika ne’ebé mai ho objetivu atu estabelese regra nesesária hodi garante seguransa no efikásia iha preskrisaun ai-moruk.

Rejime ne’e mós bele prevene prátika sira ne’ebé la loos no proteje saúde públika.

Tuir nota husi Governu, entre medida prinsipál hirak ne’e, destaka obrigatoriedade reseita médika nian. 

“Médiku no médiku dentista sira ne’ebé ezerse sira-nia atividade ho efetivu de’it maka pasa/fó reseita. Diploma ne’e mós define prazu validade másimu ba reseita no limite ba kuantidade ai-moruk ne’ebé preskreve/reseita”, dokumentu ne’e hateten.

Atu reforsa kontrolu no autentisidade reseita nian, Imprensa Nasionál Timor-Leste mak sei halo impresaun hodi garante rastreabilidade no numerasaun sekuensiál.

“Diploma ne’e prevee mós rejime fiskalizasaun no sansaun, inklui koima no pena adisionál ba kazu inkumprimentu”.

Jornalista: Arminda Fonseca

Editora: Maria Auxiliadora