BAUKAU, 19 Marsu 2025 (TATOLI)–Bispu Dioseze Baukau, Dom Leandro Maria Alves, husu sarani sira atu banati tuir São José nu’udár modelu moris nian.
Bispu Dioseze Baukau, Dom Leandro Maria Alves esplika, Kreda Katólika ohin selebra festa São José ne’ebé sai Mahein ba Dioseze Baukau, tanba ne’e konvida sarani Katólika espesiál Dioseze Baukau atu hasa’e orasaun liuhosi São José atu Maromak haraik moris rahun di’ak ba ema hotu.
“São José nu’udár intersesór (perantara) ba ita iha Maromak nia futar oin. Nia mós nu’udár ezemplu fiar, responsabilidade no obediénsia,” Bispu Dioseze Baukau hateten liuhusi omília bainhira prezide misa loron Padroeiru São José ba Dioseze Baukau, iha Igreja Katedrál, Vila Antiga, Baukau, kuarta ne’e.
Tinan-ne’e, nia haktuir, Dioseze Baukau halo tinan-29 ne’ebé konsideradu nu’udár idade boot ona, nune’e São José mak sai Padroeiru tanba nu’udár pesoál ne’ebé sai ezemplu lideransa iha família, justu no kontinua fiar, rona no halo tuir Maromak nia hakarak ne’ebé hakerek iha evanjellu São Mateus no Lúcas.
Igreja Katólika rekoñese no koloka São José nu’udár virtude, modelu no títulu previléjiu nu’udár aman haki’ak ba Jesús tanba Maromak tau konfiansa tomak ba São José nu’udár mane ne’ebé nakonu ho responsabilidade no serbisu maka’as.
“Hanesan sarani, Maromak liuhusi São José hateten ba ita atu keta ta’uk tanba obedese ba Maromak hodi halo tuir Nia liafuan katak simu Nosa Señora (Maria) nu’udár ita-nia inan,” Dom Leandro haklaken.
Dioseze Baukau harii iha loron-30 Novembru 1996, iha-ne’ebé maktoban Dom Basílio do Nascimento mak sai Bispu dahuluk no hili São José nu’udár Mahein Dioseze Baukau.
Tuir dadus, sarani Dioseze Baukau hamutuk rihun 300-resin kompostu husi munisípiu haat hanesan Manatutu, Lautein, Vikeke no Baukau ho tótal parókia 22 no rezidénsia 24.
Entretantu, partisipa iha selebrasaun misa Mahein (Padroeiru) Dioseze Baukau São José mak hanesan Prezidente Autoridade Munisipál (PAM) Baukau, Veneranda Lemos Martins, Komandante Polísia Nasionál Timor-Leste (PNTL) Munisípiu Baukau, keiru/relijiozu/a, estudante no sarani sira.
Jornalista: Natalino Belo
Editór: Xisto Freitas da Piedade
