KOVALIMA, 20 Marsu 2025 ( TATOLI) – Sentru Formasaun (SF) Autoridade Protesaun Sívil (APC-sigla Portugués) fahe esperiénsia kona-ba jestaun risku dezastre intervensaun dahuluk, kontra inséndiu no primeiru sukorru báziku ba funsionáriu APC iha munisípiu Kovalima.
Xefe komisaun sientífiku no pedagójiku sentru Formasaun APC, Julito Maia, informa, formasaun ne’e parte ida atu hasa’e funsionáriu APC Kovalima nia koñesementu oinsá atu responde ba jestaun risku dezastre naturál.
“Ita-nia programa ita halai ba formasaun ba ita-nia funsionáriu APC iha Kovalima atu hasa’e sira-nia koñesementu oinsá hadia di’ak liu prestasaun servisu ita terrenu”, Julito Maia haktuir ba jornalista sira, iha edifísiu CVTL Kovalima, ohin.
Formasaun ne’e foku área jestaun dezastre no intervensaun kona-ba inséndiu kona-ba sukorru ba dahuluk APC presiza fasilita nafatin formasaun maske durante ne’e halo atendementu di’ak liuhusi fahe esperiénsia atu kompleta di’ak liután.
“Dala ruma ita-nia kolega sira iha parte seluk seidauk iha koñesementu liuhusi fahe esperiénsia atu kompleta malu hodi bele hadi’a di’ak liu hodi responde ba komunidade sira”, nia informa.
Atu atende jestaun risku dezastre naturál haree ba siklu sira hanesan molok deszatre haree liu ba prevensaun mitigasaun hodi hamenus risku sira, hafoin dezastre haree durante dezastre apoia responde emerjénsia korpu bombeiru halo buska no salva hodi evakua vítima ba fatin seguru no halo avaliasaun molok atu fó apoiu emerjénsia.
Formasaun ne’e hala’o durante loron semana ida, ne’ebé hahú iha segunda loron 17 Marsu ne’ebé sei ramata iha loron 21 Marsu ne’e
Iha sorin seluk, Komandante korpu Bombeiru Noti de Jesus Alves Kovalima hateten katak funsionáriu APC presiza fasilita formasaun nune’e atu eleva sira-nia koñesementu nune’e bainhira tuun ba terrenu hodi kombate ruma presiza ekipa sukorru ba dahuluk molok lori ba iha ospitál.
“Klaru, presiza formasaun ba funsionáriu tanba pesoál tuun ba terrenu presiza iha koñesementu molok atu apoiu presiza safety (salvasaun) ba sira-nia aan. Dezastre ita la espera”, nia dehan.
Preparasaun atu responde ba risku dezastre korpu bombeiru hamahan aan iha APC formasaun ne’e parte ida atu aumenta koñesementu oinsá atu atende ho di’ak liu.
Jornalista:Celestina Teles
Editór:Rafael Ximenes de A. Belo
