Autoridade Uaimori husu PNTL asegura materiál funu iha aldeia Uma Liurai
VIKEKE, 20 Marsu 2025 (TATOLI)—Xefe suku Uaimori, postu Vikeke Vila, munisípiu Vikeke, Francelino Antonio Gomes, husu Polísia Nasionál Timor Leste (PNTL) asegura materiál funu bomba ne’ebé iha komunidade aldeia Uma Liurai nia kintál, tanba sai ameasa ba komunidade sira-ne’ebé hela besik.
“Materiál funu nian, bomba ida-ne’e iha kedas ita-nia komunidade aldeia Uma Liurai sira-nia kintál laran, halo ita-nia komunidade tauk la halo ona sira-nia toos. Tanba ne’e, ha’u husu autoridade segurada foti medida ruma asegura tiha bomba ka destroi tiha. Se halo distrusaun mak nakfera sei impaktu ba ita-nia komunidade tanha bomba referida boot,” Francelino Antonio Gomes hateten ba Agência Tatoli iha postu Vikeke Vila, ohin.
Autoridade Uaimori ne’e dehan, tinan kotuk autoridade Uaimori relata ona ba PNTL eskuadra Vikeke Vila, hodi ba haree direta ona bomba referida maibé to’o agora bomba ne’e seidauk asegura.
“Tanba ne’e, ha’u hakarak husu PNTL aselera asegura Bomba iha suku Uaimori, atu labele fó ameasa ba komunidade ne’ebé halo toos sira, hein karau sira-nia vida,” nia hateten.
Iha fatin seluk, Ofisiál Polisiamentu Suku (OPS) iha suku Uaimori, Domingos Viegas Soares Pinto, hateten bomba ne’e daudaun sei iha hela área Loime, aldeia Uma Liurai, seidauk iha desizaun ruma husi komandu PNTL nasionál atu halo distroisaun, tanba ne’e matériál funu nian ne’e sei nafatin iha ninia fatin.
“Bomba ne’e boot, ema na’in-haat (4) foti mós labele. Iha tinan kotuk, ami ho komandante eskudra bá haree direta ona no hato’o ona relatatóriu ba Komandu PNTL nasionál hodi haree asuntu bomba ne’e maibé to’o agora ami seidauk simu desizaun ruma. Karik, iha ona desizaun karik ita ba distrusaun ba bomba referida ne’ebé ita hein de’it, desizaun husi komandu PNTL,” nia dehan.
Nia dehan, perigu liu iha tempu bailoro tanba komunidade ba buka rai ruma iha área ne’ebá kuidadu tanba kuandu nakfera sei afeta ba komunidade.
“Nune’e, ba komunidade labele la’o besik ba bomba funu nian. Atu nune’e labele prezudika ba ita-nia vida,” nia hateten.
Entretantu, dadus populasaun aldeia Uma liurai na’in-575, Uma boot na’in-35,
Uaibubo na’in-395, Lulei na’in-393, Uatulesu na’in-684 no aldeia
Meauai na’in-250.
Jornalista : Vitorino Lopes da Costa
Editór : Cancio Ximenes
