DILI, 20 Marsu 2025 (TATOLI)-Klubu El-Matadór boxé, ofisialmente, anúnsia ba públiku, liuhusi Konferénsia imprensa, katak Boxista nasionál Timor-Leste, Delio Anzaqeci Mouzinho husi Klubu El-Matador Boxe sei kontinua ninia formasaun profisionál, iha Kanadá, durante fulan tolu; Abríl to’o Juñu.
“Ha’u agradese bele hetan oportunidade ida-ne’e husi Caltech ne’ebé mak sempre suporta husi inisíu to’o agora. Espera katak husi treinamentu iha ne’ebé bele sai hanesan ha’u-nia eskola hodi realiza ha’u-nia mehi sai realidade”, Delio Mouzinho hateten liuhusi entrevista ba jornalista sira, iha Caltech, Bidau-Lesidere, ohin.
Boxista timoroan ne’e konsidera katak Kanadá nu’udar nasaun ida-ne’ebé luan no iha fasilidade kumpleta no mós treinadór famozu, nune’e nia sei aproveita oportunidade ne’e hodi treinu ho di’ak no husi esperiénsia ne’ebé hetan, kompromete sei fahe fali ba joven sira ne’ebé gosta boxe iha Timor-Leste.
Kanadá ne’e nasaun norte liu iha Amérika Norte. Nasaun ida-ne’e kompostu husi provínsia 10 no territóriu tolu, ne’ebé adere ba sistema desentralizadu. Área Kanadá nian atinji 9.970.610 km2. Nasaun ida-ne’e klasifika hanesan nasaun dezenvolvidu, ne’ebé nia ekonomia depende ba produtu naturál sira.
Patrosinadór ba Boxista Delio Mouzinho, Jean Vezina hateten, nia parte ho espoza sente orgullu bele apoia El-Matador dezde tinan-2019 to’o agora.
“Ami fiar iha kbiit desportu nian atu inspira no hasa’e Timor-Leste nia atleta joven sira, hanesan patrosinadór no hakarak apoiu nafatin ba Delio hodi bele hetan ninia karreira boxista internasionál ninian”, patrosinadór ne’e otimista.
Nia hatutan, “Iha biban ida-ne’e ami sei apoiu Delio ba Kanadá ba treinamentu fulan tolu nia laran iha Monte-Real Boxing Clube, ho treinadór famozu ida Estevan Labbous, no agradese ba esforsu no susesu sira ne’ebé Delio hetan ona nune’e bele aumenta di’ak liután ninia koñesimentu iha área boxe”.
Enkuantu, Zezito da Silva hanesan Sekretáriu-jerál El-Matador konfirma, hanesan hatene ona katak hafoin Delio Mouzinho ho Deniel Belo fila husi kompetisaun iha Bali, nune’e ohin loron ekipa El-Matadór ho patrosinadór husi Caltech Group, publikamente, ona katak Delio sei arranka ba Kanadá iha loron sábadu agora hodi tuir treinamentu.
“Ami agradese ba patrosina sira tanba fó ona oportunidade ba ekipa boxé El-Matador nian hodi ba kontinua ninia koñesimentu liuhusi formasaun intensiva ne’ebé nia sei halo iha Kanadá. Espera sei lori buat di’ak mai Timor”, sekretáriu ne’e akresenta.
Entrentante, maske antes ne’e Caltech Group oferese ona ba boxista nasionál ne’e, maibé hetan adianta diretamente husi boxista referidu tanba sei kontinua tan kompetisaun HSS mini fight vol.1 sport show 2024, iha Bali, Indonézia. Tanba ne’e, iha oportunidade ida-ne’e Delio deside sei ba Kanadá hodi kontinua nia karreira. Enkuantu, apoiu finanseiru, patrosinadu mesak husi kompaña Caltech Jean Vezina ho nia espoza Sheilla Caldas da Silva nu’udar Diretora Caltech Group.
Jornalista: Alexandra da Costa
Editór: Rafael Ximenes de A. Belo
