BTL Vikeke normaliza kanu distribuisaun bee-moos ba komunidade Kabira-Oan
VIKEKE, 20 Marsu 2025 (TATOLI)—Bee Timor Leste, Empreza Públika (BTL, E.P) munisípiu Vikeke, normaliza fali kanu distribuisaun ne’ebé kotu hodi kanaliza fila-fali bee-moos ba komunidade aldeia Kabira-oan, suku Karaubalu, postu Vikeke Vila, hela iha área Pemancar.
Notísia Relevante: Abitante Cabira-oan uma kain 50 la asesu bee-moos
Koordenadór BTL, E.P munisípiu Vikeke, Marito da Costa, informa kaza bee-moos la sae ba área pemancar tanba kauza husi ema taka rai, fatuk no ai iha kanu leten no karreta para tán tiha iha leten halo kanu kabetak bee labele sae bá komunidade iha área pemancar.
“Ami-nia ekipa halo ona identifika ba kanu distribuisaun ba área pemancar nian, ne’ebé ami-nia tékniku identifika no hetanona. Nune’e, ita-nia tékniku sira foin lalais halo fali ona normalizasaun ba kanu ne’ebé aat, hodi fornese fila-fali bee-moos ba ita-nia komunidade.” Marito da Costa hateten ba Agência Tatoli iha nia kna’ar fatin, Beloi, ohin.
Marito klarifika, bee ne’ebé la sae ba área pemancar la’ós BTL mak la loke bee maibé kanu mak ema tau fali fatuk no rai, tanba ne’e bee labele distribui ba komunidad hela iha pemancar ne’e.
“Tanba ne’e, ha’u husu favor ida, bee kuandu la sai, tuir regra BTL nian, komunidade tenke mai hato’o keixa iha edefísiu BTL. Atu nune’e, tékniku sira bele hatene hodi ba observa kanu sira, la’ós komentáriu iha mídia de’it,” nia hateten.
Alenide ne’e, nia husu komunidade kuida kanu sira-ne’e atu labele tau fatuk ba kanu distribuisaun bee-moos nian, tanba kanu balun uza mangeira metan masa ne’e.
“Ita presiza kuidadu, labele para karreta iha kanu leten inklui tau-hanehan ho fatuk. Tanba, id ane’e fasilhalo kanu ne’e nakbetok, entaun labele distribui. Tan ne’e, mak ami husu komunidade sira tau matan mós ba kanu sira-ne’ebé uza masa sira-ne’e,” nia hateten.
Antes ne’e, komunidade Kabira-Oan hela iha área Pemancar hamutuk uma-kain 50 la asesu bee-moos durante fulan neen (6) nia laran, no daudaun ne’e BTL, E.P munisípiu Vikeke halo ona normalizasaun.
Tuir dadus, komunidade hela iha área pemencar totál uma kain 50 ho totál abitante 200, ne’ebé daudaun ne’e enfrenta menus ba bee-moos.
Jornalista : Vitorino Lopes da Costa
Editór : Cancio Ximenes
