DILI, 20 Marsu 2025 (TATOLI) – Banku Nasionál Komérsiu Timor-Leste (BNCTL, sigla portugés) iha ona Prezidente Konsellu Administrasaun foun, Januário da Gama, hodi substitui Lúcia da Cruz Flor.
Antes ne’e, Januário da Gama hala’o ona knaar iha setór públiku no privadu, partisipa formasaun iha governasaun korporativa no lideransa estratéjika.
“Serbisu tinan barak iha Ministériu Finansa no asume kargu hanesan Diretór Nasionál Jestaun Ativu iha Estadu no iha Diresaun Planu no Orsamentu. Okupa resentemente pozisaun hanesan asesór tékniku iha Sekretaria Estadu Arte no Kultura”, refere nota husi BNCTL, ne’ebé TATOLI asesu.
Prezidente Konsellu Administrasaun ne’e sei lidera konsellu iha orientasaun estratéjika, asegura governasaun korporativu ne’ebé forte no superviziona dezempeñu jerál banku no jestaun risku.
Aleinde ne’e, nomeia mós Marcelo da Cruz Carvalho hanesan Prezidente Komisaun Ezekutiva hodi troka António Vítor.
“Esperiénsia iha setór bankáriu no finanseiru iha BNCTL. Serbisu husi ezisténsia Institutu Mikrofinansa Timor-Leste to’o kriasaun BNCTL iha 2011”, dokumentu ne’e fó sai.
Marcelo Carvalho, antes ne’e, asume kargu nu’udar Jerente Sukurál Dili, Jerente Divizaun Kréditu, Divizaun Aprovizionamentu no Lojísitka no seluk tan.
Prezidente Komisaun Ezekutiva foun ne’e sei responsabiliza operasaun iha banku, implementa inisiativa estratéjika no dudu kreximentu sustentavel.
Nota ne’e esplika katak nomeasaun ne’e halo hafoin mandatu husi dirijente sira anteriór termina iha 31 Dezembru 2024.
TATOLI
