KOVALIMA, 20 Marsu 2025 (TATOLI) – Servisu Munisipál Konservatóriu Rejistu Notariadu (SMKRN) Kovalima halo atendementu ba sidadaun sira hodi trata pasaporte bazeia ba oráriu husi Diresaun jerál (DJ).
“Ami halo atendementu sidadaun sira trata pasaporte nia sistema la hanesan uluk tanba sistema dadaun-ne’e oráriu atu atende sidadaun pasaporte submete husi nasionál mak mai nune’e tu’ir ha’u-nia hatene atendementu semana ida dala rua”, Diretora servisu munisipál konservatóriu rejistu notariadu Kovalima, Filomena Gusmão relata ba TATOLI, iha Bairru Rompe, ohin.
Ho nune’e kona-ba loron atendementu depende oráriu ne’ebé mak husi nasionál manda mai iha Notariadu munisípiu Kovalima nune’e ba fulan-Abríl Notariadu seidauk simu oráriu atendementu.
Dirijente Notariadu Kovalima ne’e informa, bazeia oráriu ba atendementu sidadaun trata pasaporte loron 6, 14, 19 , 24 ho 27 ne’e, maibé kona-ba oráriu atendementu trata pasaporte ba fulan-Abríl seidauk hatene tanba sei hein oráriu husi nasionál submete mai iha Notariadu Kovalima.
Bazeia ba oráriu ne’ebé iha Marsu ne’e, funsionáriu notariadu loron ida bele atende sidadaun trata pasaporte ema na’in-20 bele mós liu maibé depende mós sistema.
Durante Notariadu halo atendementu sidadaun sira iha Kovalima maioria trata pasa porte ho tipu komum de’it ne’ebé balun trata ho folin $ 50 no balun trata pasa porte ho folin $ 75 no balun $ 100.
Ho nune’e nia informa nia parte seidauk bele fó sai dadus atandementu sidadaun trata pasaporte tanba okupadu ho servisu.
Kona-ba oráriu atendementu ba fulan-Abríl nia parte seidauk hatene oráriu atendementu ba sidadaun sira atu trata pasaporte nune’e seidauk bele fó sai bainhira husi nasionál fó haruka mai ona munisípiu mak foin bele fó sai ba sidadaun sira atu trata pasaporte iha Notariadu Kovalima.
Notariadu Kovalima aleinde atende trata pasaporte halo atendementu mós ba sidadaun trata sertidaun RDTL , Rejistu Kriminál, sertidaun Óbitu no Billeti identidadde ne’ebé daudaun ne’e halo atendementu imprimi provizóriu ba sidadaun ne’ebé trata BI.
“Ba sidadaun ne’ebé mak foin lalais trata BI ho provizóriu daudaun ne’e ami bele imprimi ona BI ho orijinál tanba iha loron 16 Marsu ne’e diresaun nasionál haruka ona blanko BI orijinál hamutuk 500”, nia informa.
Iha Janeiru tinan ne’e blanko orijinál haruka mai iha munisípiu hamutuk 500 ne’ebé uza hotu ona no iha loron 16 Marsu ne’e notariadu simu tan blanko BI orijinál 500 nune’e ba sidadaun ne’ebé imprimi BI provizóriu bele hakat mai imprimi ona BI orijinál.
Fó hanoin fali katak tuir dadus sidadaun ne’ebé trata Sertidaun RDTL ne’ebé iha tinan-2024 ne’e, sidadaun hamutuk 1,109, sertidaun Kazamentu 20, Óbitu 68 , Billeti Identidade 3,144 no rejistu Kriminál 2088.
Jornalista:Celestina Teles
Editór: Rafael Ximenes de A. Belo
