Xanana: “Pesoál servisu edukasaun-saúde hala’o misaun la’ós atu buka osan”
DILI, 20 Marsu 2025 (TATOLI)–Primeiru-Ministru, Kay Rala Xanana Gusmão, alerta ba pesoál hirak ne’ebé servisu iha área edukasaun no saúde ne’e hanesan hala’o misaun ida la’ós atu buka osan.
“Ha’u temi beibeik katak iha servisu rua ne’ebé la’ós servisu atu hetan osan, mak hanesan edukasaun ho saúde, sira nia servisu ne’e misaun,” Xefe Governu ne’e hateten ba jornalista sira iha hafoin hala’o enkontru ho Xefe Estadu, José Ramos Horta, iha Palásiu Prezidensiál Nicolau Lobato, Bairru Pite, kinta ne’e.
Xefe Governu ne’e esplika, profesór sira hanorin labarik sira atu sai matenek hodi serbí rai ida ne’e no pesoál saúde sira hanesan doutór no enfremeiru sira atu kura ema ho didi’ak, tanba ita iha tinan sira mai ne’e Timor-Leste tenke saudavél no edukadu.
“Ho ida-ne’e mak ita bele kurije harii no hadi’a sistema ida-ne’ebé di’ak iha setór saúde no edukasaun,” Xanana dehan.
Tanba ne’e, Xefe Governu ne’e enkoraja pesoál saúde no profesór sira hotu atu hala’o servisu ho di’ak liután atu dezenvolve nasaun ne’e ba oin, tanba papél rua hanesan pesoál saúde no profesór importante tebes iha nasaun ne’e.
Jornalista : Hortencio Sanchez
Editór : Cancio Ximenes
