VIKEKE, 21 Marsu 2025 (TATOLI)—Autoridade ho funsionáriu públiku (FP) ne’ebé servisu iha postu administrativu Lakluta inisiativa fó apoia nesesidade bázika ba família vulneravel uma kain 10 iha postu Lakluta, munisípiu Vikeke.
Xefe suku Dilór, Jacinto Ximenes, hateten atividade apoia nesesidade bázika ba família vulneravel sira-ne’e tanba haree ba kondisaun moris sira-nian ladun di’ak, nune’e oferese netik ai-han ba sira hodi hakmaan sira-nia moris loro-loron nian.
“Inisiativa ida-ne’e mai husi ami autoridade lokál no funsionáriu iha postu Lakluta mak kria rasik planu ne’e, hodi tulun ita-nia família vulneravel sira. Tanba, família sira-ne’e ita haree balun susar ba hahan. Nune’e ho apoia sira-ne’e ita atu hakmaan sira-nia moris ho nesesidade bázika ne’ebé sira enfrenta,” Jacinto Ximenes hateten ba Agência Tatoli, iha postu Lakluta, ohin.
Nia dehan, apoia nesesidade bázika ba família vulneravel iha postu Lakluta, la’ós ba suku Dilór hodi haree ba kondisaun moris hafoin fó apoia nesesidade bázika ba sira.
“Apoia nesesidade bázika ne’ebé ami fó ba postu Lakluta tomak, ne’ebé ita haree ba menus ai-han. Ami haree família balun menus liu ba ai-han, entaun liuhusi asaun sira-ne’e ita bele ajuda ita-nia maluk sira ne’e,” nia hateten.
Nia dehan, apoia ne’ebé fó ba família vulneravel sira-ne’e kompostu husi foos, mina-tein, manu-tolun, sabaun no rinso.
“Nune’e, kada uma-kain ami fó foos saku ida, mina-tein litru ida, manu-tolun rak ida, sabaun no rinso. Ho apoia ne’e bele hakmaan sira, tanba família balun moras maibé sira-nia família la tau matan hodi fó hahan ba sira,” nia dehan.
Nia planeia, semana oin, sei kontinua haao asaun karidade ne’e hodi fó apoia ba família vulneravel ne’ebé mak seidauk hetan nesesidade bázika, ne’ebé autoridade no funsionáriu sira apoia.
“Semana oin, ami sei kontinua fó apoia ba ita-nia família vulneravel sira-ne’ebé seidauk hetan nesesidade bázika ne’ebé oferese. Nune’e mós apoia nesesidade bázika ne’e, ami sei kotnua halo kada fulan tolu. Ne’ebé, ami sei buka apoia husi fatin seluk hodi oferese ba ita-nia família vulneravel sira,” nia hateten.
Entretantu, distribuisaun nesesidade bázika ne’e autoridade lokál, funsionáriu sira apoia direta família vulneravel sira iha sentru saúde postu Lakluta.
Jornalista : Vitorino Lopes da Costa
Editór : Cancio Ximenes
