DILI, 21 Marsu 2025 (TATOLI)—Diretór Servisu Apoiu Diagnóstiku no Terapéutiku iha Hospital Nacional Guido Valadares (HNGV), Vidal de Jesus Lopes, klarifika katak informasaun ne’ebé espalla iha mídia sosiál kona-ba atestadu médiku iha HNGV selu $10 ne’e laloos.
“Informasaun sira-ne’ebé lansa iha mídia sosiál kona-ba atestadu médiku ne’ebé selu $10, ohin ami konfirma ho parte atestadu médiku katak modelu atestadu médiku ne’ebé mak publika iha mídia ne’e inventadu, asinatura no karimbu ne’e laloos,” Vidal de Jesus Lopes tenik ba jornalista sira iha HNGV, Bidau, sesta ne’e.
Nia hateten, husi parte HNGV foti ona medida katak internalmente sei entrega ba Gabiente Auditoria HNGV hodi halo audit liuliu foti informasaun nune’e bazeia ba auditoria ne’e mak relatóriu ne’e sei enkamiña ba iha PCIC (Polícia Científica e de Investigação Criminal) ka Ministériu Públiku hodi halo investigasaun.
“Ne’e duni, ba maluk sira-ne’ebé publika informasaun sira-ne’e, bainhira ami enkamiña bá PCIC ka Ministériu Públiku tenke koopera atu fó informasaun loloos, nune’e prosesu ne’e bele bá-oin, tanba HNGV lakohi sasán sira hanesan ne’e akontese,” nia afirma.
Nia haktuir, durante ne’e pagamentu ba atestadu médiku ne’e $8, la’ós $10.
“Relasiona ho publikasaun ne’e, HNGV foti ona desizaun katak bá-oin, ami koordena ho parte banku atu kualker pagamentu no kualker reseita husi HNGV sei halo pagamentu liuhusi eletróniku. Sistema pagamentu ne’e ita selu modelu hanesan ita bá halo pasaporte selu ne’e,” Vidal informa.
Jornalista: Felicidade Ximenes
Editór: Xisto Freitas da Piedade
