DILI, 21 Marsu 2025 (TATOLI)—Diretór Servisu Apoiu Diagnóstiku no Terapéutiku iha Hospital Nacional Guido Valadares (HNGV), Vidal de Jesus Lopes, hateten banhira intervensaun ba bebé ne’ebé moris ho prematura iha sala perinatolojia, inan sira labele toba besik.
”Relasiona ho publikasaun iha mídia sosiál iha sala perinatolojia HNGV, bebé nia família sira ne’ebé mak toba de’it iha li’ur no sasán sira tau li’ur ne’e, tanba bebé sira moris mai nia tempu seidauk to’o ka prematura, nune’e atu halo intervensaun ba bebé prematura sira-ne’e, inan labele toba besik nia oan sira,”Vidal de Jesus Lopes informa ba jornalista sira, iha HNGV, Bidau, sesta ne’e.
Dirijente ne’e esplika katak HNGV prepara de’it kama ki’ik-oan ba bebé prematura, nune’e bebé bele toba iha-ne’ebá, nia inan sira ne’e só akompaña, la fó fatin ba nia inan atu toba hamutuk ho labarik, tanba intervensaun ba labarik sira-ne’e mak médiku sira.
Nia relata, kona-ba kondisaun ba família ne’e, HNGV kria de’it waiting room, ne’e mak foin lalais ema hasai nia foto tau iha mídia sosiál ne’e. Tanba sasán ho ema hein iha li’ur atu evita infesaun. Infesaun dalaruma lori hosi uma, dala ruma sira uza helem ba de’it, ne’e mak la autoriza tanba fo’er.
“Agora daudaun bebé purvolta 30-resin mak baixa iha-ne’ebá. Sala perinatolojia ne’e, fahe ba rua. Ida mak hanesan Sepsis Room (kuidadu intensivu ba bebé) no NICU (Neonatal Intensive Care Unit) Room (bebé foin moris). Totál kama hamutuk 62. Entaun, fatin rua ne’e la permite atu inan toba hamutuk ho bebé sira iha-ne’ebá,” Vidal subliña.
Nia reforsa, bebé ne’ebé mak moris normál ne’e, kolokadu iha sala maternidade no hafoin inan sira partu bele fila bá uma tanba kondisaun normál, maibé inan sira-ne’ebé mak partu ho nia tempu seidauk to’o tenke bá iha sala perinatolojia hodi halo tratamentu intensivu.
Jornalista: Felicidade Ximenes
Editór: Xisto Freitas da Piedade
