DILI, 21 Marsu 2025 (TATOLI)—Ministériu Justisa (MJ) prepara ona esbozu lei estruturante hamutuk 20-resin iha ámbitu reforma setór justisa no sei hato’o ba Parlamentu Nasionál atu halo diskusaun no aprovasaun.
“Iha lei estruturante 20-resin ami halo submisaun iha setór justisa nian, ita tenke halo ajendamentu,” Ministru Justisa, Sérgio Hornai, hateten hodi hatan ba pergunta husi Jornalista Agência Tatoli, iha edifísiu Ministériu Finansa, Aitarak-laran, sesta ne’e.
Notísia relevante : Governu sei submete lejislasaun kona-ba reforma justisa ba PN atu diskute
Nia dehan, esbozu lei hirak ne’e mak hanesan krime sibernétika, lei protesaun ba dadus pesoál hodi garante ema hotu nia liberdade no respeitu direitu umanu no ema seluk ninia dignidade, onra no privasidade.
Aleinde ne’e, lei rejime jerál kontra ordenasaun tanba MJ konsidera importante atubele fó reseita no aplikasaun koima, lei orden advogadu, lei servisu órgaun Polísia Kriminál no seluk tan.
“Hirak ne’e ita iha ona kbiit atu haree presiza halo reforma para ita-nia lei estruturante ne’ebé mai bele kompatível ho ita-nia realidade,” nia akresenta.
Tuir Ministru , ezbosu lei sira ne’e iha ona no atu halo reabertura de’it.
“Tanba iha lei barak iha Gabinete Ministru Prezidénsia Konsellu Ministru nian atubele halo ajendamentu bele sai proposta no projetu lei hafoin lori ba órgaun lejislativu,” governante ne’e katak.
Iha ámbitu reforma justisa, MJ serbisu hamutuk ho Grupu Traballu Reforma Setór Justisa, ne’ebé antes ne’e mós haruka ona joven timoroan na’in-50 hodi hala’o estudu iha área direitu iha Portugal hodi iha futuru bele sai juís, prokuradór no defensór.
Antes ne’e, iha tinan 2024, Prezidente Parlamentu Nasionál, Maria Fernanda Lay, akompañadu husi bankada parlamentár ho Komisaun A ne’ebé trata asuntu Justisa no Konstituisionál simu audiénsia husi Koordenadora Grupu Traballu Reforma Setór Justisa, Lúcia Lobato, hodi hato’o serbisu sira-ne’ebé hala’o ba órgaun soberania daruak ne’e, no ba oin lejizlasaun barak mak sei hato’o ba Parlamentu hodi bele diskute no aprova.
Jornalista : Nelson de Sousa
Editora : Julia Chatarina
