DILI, 21 Marsu 2025 (TATOLI)-Diretór Nasionál Rekursu Umanu iha Ministériu Edukasaun (ME), João Amaral, hatete dekretu lei númeru 31/2023, 31 maiu ne’ebé ko’alia konaba estatutu kareira dosente, kandidatu sira ne’ebé iha bolsa kandidatu sei koloka bainhira iha vaga no bazeia ba kuadru pesoál.
Nia husu ba profesór rekrutadu iha bolsa kandidatu atu lalika tauk ka labele hanoin atu la koloka, tanba profesór sira-ne’e sei bele to’o tinan tolu.
“Kandidatu sira ne’e bele hela iha bolsa to’o tinan tolu”, nia dehan ba TATOLI iha nia knaar fatin Vila Verde, sesta ne’e.
Nia dehan neste momentu Ministéiru Edukasaun iha bolsa kandidatu hamutuk 1.072, ba grupu rekrutamentu ensinu báziku primeiru siklu no segundu siklu.
“Bainhira iha neseidade, Ministéiru Edukasaun sei koloka profesór bazeia ba kuadru pesoal. Kolokasaun ida-ne’e mós hodi troka profesór sira ne’ebé reforma no moras grave sira”, nia afirma.
Semana kotuk liubá Ministériu Edukasaun fó-sai bolsa kandidatu faze-daruak husi númeru seriesaun 1-224 atu submete dokumentu komprovativu hodi hetan kolokasaun. Vagatura 224, nune’e na’in-11 ba ensinu báziku no na’in-213 ba Pre-eskolár nian.
Bazeia ba despaxu omologasaun Ministra Edukasaun ho númeru 044/GM-ME/VIII/2024, loron 23 Agostu 2024 ne’ebé aprova bolsa kandidatu ba grupu rekrutamentu primeiru-siklu no segundu-siklu Ensinu Báziku ho kandidatu 2.441.
Bazea ba despaxu ministeriál númeru 09/2025, 12 Marsu, kona-ba xamada ba kandidatu integradu iha bolsa kandidatu ba grupu rekrutamentu primeiru no segundu siklu ensinu báziku atu okupa vaga iha kuadru pesoál edukasaun ensinu pre-eskolár no ensinu báziku.
Nune’e Diresaun Nasionál Rekursu Umanu aviza ba kandidatu sira husi númeru 1 to’o 224 atu haree avizu kolokasaun tuir despaxu ministeriál 09/2025 loron 12 Marsu ba kandidatu sira.
Notísia relevante: Antigu profesór kontratadu 251 mak tama ona ba bolsa kandidatu
Jornalista : Osória Marques
Editora : Rita Almeida
