DILI, 20 Marsu 2025 (TATOLI)–Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Falur Rate Laek hateten nia iha konseitu hakarak dezenvolve forsa armada sai forsa ne’ebé profosionál durante nia mandatu.
“Hanesan ita-boot sira hatene ha’u-nia konseitu lideransa ba F-FDTL mak atu kria forsa armada ne’ebé profisionál foka ba rekursu umanu ne’ebé iha kapasidade atu kumpri sira-nia responsablidade konstitusionál iha ambiente konjuntu, kooperativa no kolaborativa,” Falur hateten liuhusi nia deskursu iha enserramentu Kursu Estadu Maiór Konjuntu Integradu (CEMCI-sigla portugés) edisaun datoluk no kursu dahuluk ba Kapitaun Portu ba tinan 2024/2025 inklui abertura ba CEMCI edisaun dahaat tinan letivu 2025/ 2026 ne’ebé hala’o iha Auditóriu Kuartél Jenerál F-FDTL, Fatuhada, Dili, kinta ne’e.
Falur hatutan katak durante nia mandatu mós sei foku ba modernizasaun estrutura no moderniza meiu no infraestrutura militár.
“Ha’u-nia konseitu lideransa nian ankora iha pilár sira-ne’ebé mak ha’u konsentradu, mak ema, fó prioridade ba bem-estar militár, aprofunda unidade no kolaborasaun intelejénsia sira. Nune’e mós kooperasaun multi nasionál atu husi ita-nia lideransa tenke tranzmite forsa iha karater aten-barani no determinadu,” nia afirma.
Tuir Jenerál katak formasaun ba rekursu ne’e importante liuliu formasaun ba jestaun mak sai xave ba susesu. Tanba, bainhira ko’alia kona-ba líder no jestór nian ne’e sai ajente ba mudansa. Ne’e duni, kursu sira-ne’ebé Institutu Defeza Nasionál (IDN) halo ne’e hanesan Xefe Estadu Maiór Jenerál F-FDTL kontinua aposta ba kapasitasaun ba forsa armada.
“Forsa armada ida atu sai profisionál ne’e ida mak liuhusi formasaun para ba futuru ne’e sai di’ak liután, tanba ema hanesan ami ne’e ami preokupa ba estabilidade futuru nian,” nia konklui.
Jornalista: Natalino Costa
Editór: Xisto Freitas da Piedade
