DILI, 22 Marsu 2025 (TATOLI) – Ministru Interiór, Francisco da Costa Guterres, akompaña husi Segundu Komandante Jerál Polísia Nasionál Timor-Leste (PNTL), Pedro Belo, hala’o vizita, ohin, bá Unidade Polísia Marítima (UPM) hodi haree direta serbisu UPM nian no tranzmite planu Governu nian.
Vizita ida-ne’e halo iha ámbitu selebrasaun aniversáriu PNTL nian ba da-25 ho tema “Hamutuk Ita Hametin Konfiansa”.
“Ita halo ida-ne’e tanba ba Governu, PNTL órgaun importante ida iha Estadu. Estadu fó fiar ba ita-boot sira ka’er setór importante iha nasaun, bolu seguransa, nune’e serbisu obedese ba ierarkia”, governante hateten iha Lesidere, ohin.
Ministru ne’e dehan, Governu no Estadu haree katak PNTL importante, nune’e prepara kondisaun atu instituisaun ida-ne’e hala’o nia serbisu ho di’ak.
“Tanba esperiénsia barak hatudu katak, se la tau-matan ba orgaun ida-ne’e sei iha problema. Estadu mós bele iha problema bainhira orgaun ida-ne’e la hadi’a kondisaun serbisu, la tau didi’ak regra atu regulariza órgaun ida-ne’e”, salienta.
Iha vizita ne’e, governante husu ba membru UPM sira serbisu ho di’ak atu asegura nasaun, liuhusi kontrola atividade ilegál sira hanesan peska no seluk tan.
Nia afirma, polítika Governu nian ba PNTL mak hahú daudaun ona halo mudansa, liuhusi estatutu PNTL nian no iha tempu badak sei halo promosaun mós ba membru polísia 2.700-resin.
Iha fatin hanesan, Segundu Komandante Jerál PNTL, Pedro Belo, hato’o parabéns ba Unidade Polísia Marítima tanba durante ne’e hala’o serbisu ho profisionál nu’udar seguransa ba rai ida-ne’e.
“Ita-boot sira-nia serbisu iha tasi-laran, liuliu salva vida, ida-ne’e serbisu di’ak tebes, maibé komandu nafatin ezije ita-boot sira katak mantein disiplina ne’ebé iha”.
Nia apela ba membru sira atu nafatin serbisu ho responsalididade, labele haluha kultura PNTL nian katak obedese ba ierakria.
Iha vizita ne’e, Komandante Unidade Polísia Marítima, Superintendente Polísia Eugénio Pereira, agradese bá vizita husi Ministru Interiór no Segundu Komadante Jerál tanba bele rona direta preokupasaun sira.
Nia dehan Unidade Polísia Marítima durante ne’e hala’o knaar iha kompañia tolu mak súl, norte no operasaun ofisiál ka forsa espesiál nian.
Durante 2024, UPM konsege hala’o serbisu buska nomós halo salvamentu ba komunidade ne’ebé hetan risku. Ida-ne’e hanesan rezultadu serbisu ne’ebé UPM dezeña hodi orienta nia membru sira atu hala’o sira-nia misaun.
“Ita-nia serbisu halo intervensaun ba iha atu kriminál sira, tráfiku umanu, peska ilegál, nomós asaun tráfiku umanu ba iha terrorizmu. Difikuldade mak sei falta ekipamentu balun apoia UPM nia serbisu iha tasi-laran. Laiha ekipamentu espesífiku liga ba ekipa sira hala’o [salvamentu bainhira] peskadór hetan dezastre ruma iha tasi-klaran. Difísil tebes Polísia Marítima atu lokaliza tanba laiha GPS no laiha koñesimentu uza GPS”, nia hato’o.
Jornalista: Arminda Fonseca
Editora: Maria Auxiliadora
