KOVALIMA, 24 Marsu 2025 (TATOLI) –Konsellu Munisipál Kombatente Libertasaun Nasionál (CMCLN, sigla portugés) Kovalima hein de’it orientasaun husi Ministériu Asuntu Kombatente Libertasaun Nasionál (MAKLN) atu submete dokumentu veteranu ne’ebé rejistu iha 2003.
“Ha’u simu ona sirkulár husi Prezidente CCLN, iha loron 10 Marsu 2025 ne’ebé prosesu rejistu iha 2003 ne’e hahú iha loron 18 Marsu to’o iha loron 20 Abríl 2025 ne’e”, Prezidente Munisipál CLN Kovalima, Osorio Soares “Mausoko” relata ba jornalista sira, iha Tabakolot, ohin.
Ho nune’e, nia dehan, daudaun ne’e veteranu ne’ebé primeiru rejista 2009 nia dokumentu kompleta ona iha CMCLN Kovalima nune’e hein de’it orientasaun atu tau iha sistema hodi haruka ba iha nasionál.
“Haree ba servisu bo’ot liu atu labele hadi’a tan, dokumentu 2003 tama hotu hein de’it orientasaun atu haruka ami mantein dokumentu ne’ebé tama ona, tanba servisu todan, la presiza atu imprimi ona dokumentu iha konsellu, ami haruka ba de’it ona tanba sira-nia fixa kompletu ona tau ona iha kaixa laran”, nia dehan.
Bazeia ba karta sirkulár númeru 843/A-CCLN/III/2025 orienta ba prezidente CMCLN hotu atu orienta sekretariadu kontinua halo atendementu husi simu folla reklamasaun no kontestasaun ba fulan ida tan .
Tuir desizaun Reuniaun Ministru ACLN ho Konsellu Kombatente Libertasaun Nacionál- CCLN ne’ebé ko’alia asuntu līgadu kombatente libertasaun nasionál, hato’o karta Sirkulár ba Prezidente CMCLN hotu hotu iha territóriu nasionál atu orienta.
Sekretariadu kontinua halo atendimentu hodi simu folla reklamasaun ho kontestasaun nian, ba fulan ida tan ba rejistu 2009 nian hahú husi loron 18 de Marsu to’o 18 Abríl 2025 no lori mai entrega iha Base dadus.
Sekretariadu CMCLN hodi halo atendimentu ba folla kontestasaun no reklamasaun primeiru rejistu nian (2003, 2005) hahú dia 18 Marsu 2025 to’o dia 18 Abríl 2025, hodi lori mai nasionál entrega iha Base de Dados.
Hasai fotokópia kada kontestasaun ho reklamasaun no rejista iha livru rejistu kontestasaun ho reklamasaun nian iha ida-idak nia sekretaridu atubele konfirma fali iha tempu ikus kuandu presiza konfirmasaun.
Jornalista: Celestina Teles
Editór: Rafael Ximenes de A. Belo
