DILI, 24 Marsu 2025 (TATOLI) – Empreza Stratacom Global Investment Group husi Brunei Darussalam aprezenta sira-nia proposta ba Primeiru-Ministru, Xanana Gusmão, kona-ba planu investimentu iha munisípiu Manatutu no Baukau.
Enkontru ne’e hetan mós partisipasaun husi Ministru Administrasaun Estatál, Tomás Cabral, Prezidente Autoridade Munisípiu Baukau, Veneranda Lemos Martins, no Prezidente Autoridade Munisípiu Manatutu, Luís Fernandes.
“Ami ho Primeiru-Ministru enkontru ohin ne’e di’ak tebes. Ami iha ne’e tinan barak ona, ami vizita ona fatin oioin, entaun ohin ami-nia prezensa iha sorumutu ne’e aprezenta kona-ba planu investimentu iha infraestrutura no atividade sosiál iha munisípiu Baukau no Manatutu”, Diretór-Ezekutivu Stratacom Global Investment Group, Peter Wong, hateten iha Palásiu Governu, ohin.
Nia dehan katak planu investimentu ne’e serbisu hamutuk ho Ministru Tomás Cabral no hetan apoiu husi Embaixadór Timor-Leste nian iha Brunei, Abel Guterres.
Iha aprezentasaun ne’e Xefe Governu husu ba Stratacom atu prepara kle’an planu investimentu, nune’e bele implementa.
“Primeiru-Ministru husu atu esplika ho detallu kona-ba ita-nia investimentu sira iha Timór, no hamutuk ho autoridade sira husi Baukau no Manatutu, hodi diskute tan investimentu infraestrutura sira no atividade sosiál sira iha Timór. Primeiru-Ministru hateten katak ne’e aprezentasaun ida ne’ebé di’ak tebes, no nia gosta proposta sira, no nia hakarak husu tempu ruma ita mai fali hodi diskute idaidak ho detallu”, salienta.
Peter Wong salienta Xefe Ezekutivu fó resposta pozitiva ba aprezentasaun ne’e, tanba bele apoia investimentu iha Timor-Leste no sei filafali mai ho aprezentasaun ne’ebé kle’an liu.
Prezidente Autoridade Munisípiu Manatutu, Luís Fernandes, afirma investimentu ne’ebé Stratacom Global hanoin atu halo iha Manatutu mak iha setór turizmu, ne’ebé sei tau iha fatin rua diferente mak One Dollar Beach no Business Park iha Obratu.
Ba investimentu iha Baukau, sira iha opsaun lubuk ida tanba munisípiu ne’e iha aeroportu no sidade sira ne’e hakarak filafali hanesan sidade antiga portugeza.
Antes ne’e, iha Agostu 2023, Stratacom Global aprezenta ona projetu investimentu multisetorál ba Ministru Prezidénsia Konsellu Ministru, Agio Pereira, kona-ba projetu investimentu no dezenvolvimentu multisetór abranjente iha Baukau no Dili.
Empreza Stratacom aprezenta ona projetu ambisiozu ida ne’ebé hakarak insentiva kreximentu ekonómiku no sosial iha sidade sira Baukau no Dili, nune’e mós iha sidade adjasente sira, ho konstrusaun husi kompleksu turístiku oioin, área indústria sira, instalasaun sira ba produsaun enerjia renovavel nian no infraestrutura sira seluk.
Proposta ne’e inklui konstrusaun kompleksu turístiku modernu ida hodi promove setór turizmu nasionál. Atu hasa’e ekonomia lokál, projetu prevee kriasaun parke industriál sira hodi atrai empreza sira no estimula produsaun no kriasaun empregu iha nasaun ne’e.
Projetu ne’e inklui mós investimentu sira iha produsaun enerjia renovavel no estrasaun minerál sira.
Projetu ne’e prevee dezenvolvimentu infraestrutura importante sira seluk no oferese abordajen integradu ida ba dezenvolvimentu, hodi garante katak iha área sira ne’ebé dedika ba setór xave sira hanesan indústria, turizmu, komérsiu, kuidadu saúde no abitasaun.
Jornalista: Arminda Fonseca
Editora: Maria Auxiliadora
