VIKEKE, 24 Marsu 2025 (TATOLI)—Diretór Programa Dezenvolvimentu Investimentu Munisipál (PDIM) Viqueque, Joaquim Fernandes, informa, progresu konstrusaun fíziku edifísiu administrasaun postu Ossu no morru protesaun daudaun ne’e kuaze konklui.
“Projetu ne’e implementa iha tinan 2023, ninia progresu fíziku daudaun ne’e ita-nia empreza emplementadór ba obra referida atinje ona 100%,” Diretór hateten iha ninia knaar fatin, munisípiu Vikeke, tersa ne’e.
Daudaun ne’e tama ona iha faze retensaun ho durasaun fulan-tolu no hein pedidu pagamentu husi empreza responsável.
“Projetu ne’e sei ramata iha fulan ida-ne’e (Marsu) nia laran, durante ne’e ami halo monitorizasaun ba projetu edifísiu postu Ossu no morru ho kualidade di’ak. Tempu badak ita sei inaugura edifísiu ne’e atu autoridade sira uza ba serbisu,” nia akresenta.
Iha fatin ketak, Administradór postu Ossu, Feliciano da Costa Guterres, hateten, daudaun empreza falta hadi’a tan odamatan husi parte portaun no lampu iha edifísiu ninia oin.
“Progresu serbisu ba edifísiu no morru ramata ona, maibé odamatan portaun nian mak besi balun ladun metin kois tiha. Nune’e, ha’u halo karta pedidu ba empreza atu hadi’a no edifísiu hela lampu oin mak seidauk monta, ne’ebé ha’u fó hatene ona empreza hodi hadi’a tiha mak entrega,” nia hato’o.
Konstrusaun edifísiu administrasaun postu Ossu hahú iha Juñu 2023, ho durasaun kontratu fulan-neen, ho kustu $242.358,65, ho responsável projetu maka empreza Dira Nova Unipessoal, Lda.
Jornalista : Vitorino Lopes da Costa
Editora : Julia Chatarina
