DILI, 24 Marsu 2025 (TATOLI)—Prezidente Tane Konsumidór Timor-Leste, Robin Joi Pereira Araújo, husu ba konsumidór sira bainhira hetan irregularidade ruma kona-ba sosa sasán sira iha merkadu, tenke hato’o keixa.
“Ha’u husu ba konsumidór sira nafatin pro-ativu atu halo keixa. Karik ita-boot sira hetan irregularidade ruma durante ita-boot sira kompra sasán iha merkadu no fatin hotu-hotu hanesan sasán balun aat, labele ta’uk halo keixa. Ami prontu apoiu ita-boot sira. Se tempu laiha atu mai ami-nia fatin, bele keixa diretamente liuhusi online,” Robin Joi informa ba TATOLI, iha nia kna’ar fatin, segunda ne’e.
Nia informa katak durante ne’e sira simu keixa husi ema sira-ne’ebé preokupa ba fornesimentu komunikasaun hanesan Telemor, Timor Telekom, Telkomsel no mós keixa sira seluk kona-ba billete viajen, dealer sira fa’an karreta no keixa balun kona-ba parajen loja nian, hanesan fatin selu la tau loloos, balun keixa kona-ba produtu balun aat iha merkadu.
“Buat sira-ne’e balun ami rejistu liuhusi mídia hanesan mensajen no telefone depois sira la mai follow up,” nia hateten.
Robin Joi haktuir, Tane konsumidór durante ne’e servisu hamutuk ho Autoridade Inspesaun, Fiskalizasaun Atividade Ekonómika, Sanitária no Alimentár, Institutu Públiku (AIFAESA,I.P) hodi halo inspesaun ba loja sira-ne’ebé mak la tuir regulamentu ijiene.
“Ami durante ne’e taka ona loja no restaurante sira lubuk ne’ebé mak la tuir regualmentu ijiene. Loja balun ami bá taka tanba ami haree ida-ne’ebé mak pior liu, entaun ho ida-ne’e presiza hadi’a nune’e labele fó impaktu ba ema-nia saúde,” nia tenik.
Nia fó hanoin katak AIFAESA halo nia servisu di’ak tebes maibé labele halo de’it inspesaun ba iha parte balun, más tenke kontrola mós restaurante sira-ne’ebé la ijiene hodi hamosu peste hanesan laho, barata sira no sira seluk.
Jornalista: Felicidade Ximenes
Editór: Xisto Freitas da Piedade
