BAUKAU, 25 Marsu 2025 (TATOLI)—Komisaun Antí Korrupsaun (CAC-sigla portugés) notifika kargu diretór ho xefe departamentu sira hamutuk na’in-76 ne’ebé hala’o kna’ar iha serbisu munisipál sira iha Munisípiu Baukau.
Komisáriu CAC, Rui Pereira dos Santos, esplika karta notifikasaun fó-sai tanba pesoál hirak-ne’e seidauk prenxe formuláriu rikusoin tuir durasaun tempu ne’ebé hateten ona, nune’e liuhosi notifikasaun sei iha oportunidade loron-30 atu hato’o reklamasaun hafoin hetan sansaun multa pursentu 25.
“Autoridade Munisipál Baukau iha ema hamutuk 76 mak kona koima tanba sira la update rikusoin husi loron 1-31 Janeiru 2025,” Komisáriu CAC hateten bainhira realiza sensibilizasaun lei CAC iha Sentru Konvensaun Baukau (CCB-sigla portugés), Vila Antiga, Baukau, tersa ne’e.
Rui Pereira informa katak ho númeru hirak-ne’e, maioria husi Serbisu Munisipál Edukasaun hanesan kargu diretór eskola no xefe departamentu no liña ministeriál seluk ne’ebé tutela iha Autoridade Administrasaun Munisipál.
Nune’e, CAC nia prezensa iha Baukau ho kedas ekipa téknika halo atendimentu ba pesoál hirak-ne’e tuir duransaun loron ne’ebé fó-sai ona iha lei CAC no kontinua rejistu ba kargu diretór no xefe departamentu foun sira hamutuk 100-resin.
“Ekipa iha-ne’e atu halo atendimentu ba sira,” Rui Pereira akresenta.
Nia esplika katak pesoál 76 ne’e, CAC loke oportunidade atu halo rekursu maibé tenke ho razaun forte hanesan durante tempu deklarasaun kondisaun moras presiza atestadu médiku no viajen serbisu iha rai-li’ur presiza karta prova.
Nia rekoñese maioria pesoál 76 referidu falta informasaun kona-ba prosesu sira relasiona ho deklarasaun rikusoin ne’ebé estabelesidu, nune’e prezensa iha Baukau atu sensibiliza mós lei númeru: 7/2020 kona-ba Medida Prevensaun no Kombate Korrupsaun ba setór públiku no privadu.
Objetivu husi sensibilizasaun ne’e, nia esplika, atu hasa’e koñesimentu ba ajente públiku no privadu ligadu ho lei referida no medida rejistrasaun rikusoin.
Partisipa iha atividade sensibilizasaun ne’e mak hanesan Xefe Departamentu Serbisu Munisipál, Instituisaun Autónomu sira, Xefe Departamentu iha Autoridade Administrasaun Munisipál, Administradór Postu Administrativu sira inklu Xefe Departamentu husi liña ministeriál sira iha Baukau.
Jornalista: Natalino Belo
Editór: Xisto Freitas da Piedade
