KOVALIMA, 25 Marsu 2025 (TATOLI) – Sentru Komunidade Kovalima (CCC, sigla portugés), konvida oradór na’in tolu husi entidade oioin hodi partilla informasaun kona-ba kestaun tolu ne’ebé sai isu prinsipál, bazea ba rezultadu identifikasaun entre CCC ho autoridade lokál, ba komunidade sira, iha Suku Kamenasa, Postu administrativu Suai, Munisípiu Kovalima.
Jestora programa dezenvolvimentu feto rurál CCC, Hilaria do Carmo Amaral, informa katak, molok atu realiza atividade ne’e, CCC halo koordenasaun ho Xefe suku Kamenasa, Fernando Noronha, hodi identifika isu prioridade iha suku Kamenasa.
“Hafoin identifika isu prinsipál ami ekipa hamutuk ho xefe suku halo konfirmasaun isu sira mak hanesan disputa rai baliza, asuntu asediu seksuál no konflitu arte marsiál”, Hilaria do Carmo Amaral dehan ba jornalista sira, iha Suku Kamenasa, ohin.
Ho nune’e CCC konvida oradór sira partilla informasaun oinsá atu hasa’e komunidade sira-nia koñesementu atu minimiza violénsia ne’ebé akontese iha suku Kamenasa.
Atividade enkontru regular ne’e konvida oradór sira
hanesan, Prezidente Sub-KRAM munisípiu Kovalima ko’alia kona-ba lei ligadu ho servisu KRAM, Oradór husi Fokupers Kovalima hodi partilla informasaun kona-ba asediu seksuál no Diretór Terra no Propriedade Kovalima ko’alia kona-ba asuntu rai.
Iha sorin seluk, Xefe Suku Kamenasa, Fernando Noronha, agradese Sentru Komunidade Kovalima tanba bele partilla informasaun ba komunidade iha suku Kamenasa.
“Ita hamutuk iha fatin iha ne’e atu rona informasaun tanba durante ne’e mosu problema oioin iha suku Kamenasa ho atividade ida-ne’e bele redús problema “nia fó hanoin.
Jornalista: Celestina Teles
Editór: Rafael Ximenes de A. Belo
