Estrada bá suku Ahik Vikeke a’at lori impaktu folin foos sa’e
VIKEKE, 25 Marsu 2025 (TATOLI)—Kondisaun estrada liga bá suku Ahik, postu administrativu Lakluta, munisípiu Vikeke a’at, nune’e difikulta transporte ne’ebé tula ema no sasán atu asesu ho di’ak.
Xefe suku Ahik, Ercílio Soares, hateten, estrada ladi’ak hahú husi udan monu rai to’o agora halo folin sa’e, hanesan foos kilograma 20 ho folin $20 no kilograma 25 agora sa’e ba $22.
“Foos ne’ebé fa’an iha ami-nia suku agora folin sa’e tanba impaktu husi estrada, negosiante sira ne’ebé fa’an sasán iha karreta ne’e labele asesu ami-nia suku. Entaun, ita hetan impaktu ba folin sasán sa’e. Folin foos sa’e durante fulan ida-ne’e, hahú udan to’o agora nein karreta husi negosiante nian fa’an sasán iha ami-nia suku,” Autoridade suku hato’o ba Agência Tatoli, iha postu Lakluta, tersa ne’e.
Nia relata, kondisaun estrada daudaun kuaze nakonu ho tahu no mota laiha ponte, nune’e bainhira tempu udan transporte sira labele tama iha suku Ahik.
“Foos sira-ne’ebé negosiante sira husi Ahik fa’an ne’e sira lori kuda mak sosa, iha postu Lakluta mak bá fa’an fali iha Ahik. Dalaruma komunidade atu sosa foos, hameno ba negosiante sira, depois negosiante sira sosa iha postu Lakluta, distánsia dook no kada kuda ida tau saku rua. Tanba ne’e mak folin foos sa’e, maibé foos ne’ebé fa’an iha Lakluta ne’e folin normál,” nia katak.
Notísia relevante : Estrada aat difikulta komunidade Ahic no Laline lori produtu bá merkadu
Kondisaun ne’e halo komunidade balun nia batar a’at.
“Ba tinan ida-ne’e komunidade Ahik enfrenta menus ai-han,” Autoridade suku tenik.
Parte autoridade hato’o ona ba Governu, kona-ba estrada maibé seidauk fó resposta hodi hadi’a infraestrutura ne’e.
“Estrada ne’e la’ós difikulta ba suku Ahik de’it, maibé ba mós suku Laline, tanba suku rua ne’e iha liu área remota. Ha’u-nia esperansa ba IX Governu, ne’ebé ukun durante tinan-rua ona, labele haluha promesa sira-ne’ebé uluk dehan atu hadi’a estrada, maibé to’o agora seidauk hadi’a. Ha’u hato’o ba ministériu relevante hodi hadi’a estrada atu komunidade labele hetan impaktu ba folin foos sa’e,” nia hato’o.
Antes ne’e, Diretór Servisu Obra Públika munusípiu Vikeke, Casildo Gomes, hateten, ekipa téknika sira rekolla no relata ona bá nasionál, kona-ba dadus estrada husi Lakluta bá suku Ahik no Laline.
“Estrada parte Lakluta liga bá suku rua ne’e ami foti ona dadus no hato’o ona ba nasionál hodi haree. Ami husi munisípiu ninia serbisu ida mak rekolla dadus no aprezenta bá nasionál hodi deside,” nia katak.
Bazeia ba sensu uma-kain 2015, suku Ahik ho totál populasaun 1.247. Suku ne’e kompostu husi aldeia lima hanesan Krarek-Boku, Hali-Oan, Ai-Lo‘ok, Hali-Mean no Kai-Wa, enkuantu suku Laline ho totál populasaun 943, iha aldeia lima hanesan husi Aimeta-Hun, Fatu-Kado, Mau-Ama, Mikradek no Santo António.
Jornalista : Vitorino Lopes da Costa
Editora : Julia Chatarina
