DILI, 25 Marsu 2025 (TATOLI)–Ministru Interiór, Francisco da Costa Guterres, hateten to’o agora seidauk iha hanoin atu halo substituisaun ba atuál Komandante Jerál Polísia Nasionál Timor-Leste (PNTL), Komisáriu Jerál Polísia, Henrique da Costa no Segundu Komandante, Komisáriu Polísia, Pedro Belo, tanba sei foku rezolve kestaun promosaun diviza membru PNTL, rekrutamentu inklui reforma membru PNTL.
“Laiha. Agora ha’u sei foku ba promosaun diviza, rekrutamentu no promosaun. Ne’e hotu tiha lai mak ha’u haree,” Francisco hateten ba jornalista sira iha Bebora, Dili, tersa ne’e.
Nia dehan Komisáriu Jerál PNTL no Segundu Komandante PNTL nia mandatu sei ramata iha tinan oin (2026).
“Ita bele dehan tinan oin maka ita haree estutura Komandu PNTL. Ha’u dehan hanesan ne’e bele sai hanesan ne’e ka bele mós la sai hanesan ne’e. Maibé, agora ita rezolve tiha problema tolu ne’e lai, promosaun diviza, rekrutamentu no reforma,” nia afirma.
Francisco hatutan, Primeiru-Ministru mós husu ona katak ba instituisaun PNTL buat hotu tenke la’o tuir nia prosedimentu.
“Kuandu Konsellu Superiór Polísia aprezenta kandidatu tolu mai ha’u no ha’u sei entrega kandidatu tolu ne’e ba Primeiru-Ministru no Primeiru-Ministru hili depois lori bá Konsellu Ministru hodi diskute,” nia konklui.
Jornalista: Natalino Costa
Editór: Xisto Freitas da Piedade
