DILI, 24 Marsu 2025 (TATOLI)—Sekretaria Estadu Igualdade (SEI) ho liña ministeriál sira diskute planu asaun anuál Violénsia Bazeia ba Jéneru (VBJ) ba tinan 2022-2032 ho objetivu atu promove igualdade jéneru iha Timor-Leste.
“Ohin hanesan reuniaun dahuluk ba komisaun interministeriál hodi halo koordenasaun no fiskalizasaun ba implementasaun liuhosi planu asaun nasionál kontra violénsia bazeia ba jéneru,” Sekretária Estadu Igualdade, Elvina de Sousa Carvalho, informa iha salaun SEI, Kaikoli, segunda ne’e.
Nia dehan, husi enkontru ne’e sei prodús relatóriu ida hodi aprezenta ba Parlamentu Nasionál iha fulan-Abríl, tinan ne’e.
“Komisaun interministeriál sei prodús relatóriu kona-ba implementasaun planu asaun nasionál ba violénsia bazeia ba jéneru ba Parlamentu Nasionál no Konsellu Ministru,” nia dehan.
Iha fatin hanesan, Diretora FOKUPERS, Domingas Afonso Amaral, afirma rezolusaun Governu 49/2024 garante katak loron ida númeru kazu violénsia sei redús no ema hotu sei iha konxiénsia atu halakon violénsia no pratika di’ak sira, hanesan kria pás iha rai ida-ne’e.
“Aloka finansiamentu ba sensibilizasaun no responde ba violénsia bazeia ba jéneru, no finansiamentu barak liután mós prevee ba nia implementasaun, tanba ami fiar metin katak ho konsellu interministeriál no esforsu ne’ebé sosiedade sivíl no ita-nia governu halo, ami hakarak haree redusaun ba kestaun ne’e iha tempu naruk nia laran,” Domingas Afonso Amaral konklui.
Liña ministeriál sira mak hanesan Ministériu Edukasaun, Ministériu Saúde, Ministériu Justisa, Ministériu Interiór, Ministériu Solidariedade Sosiál no Inkluzaun, Ministériu Administrasaun Estatál, Polísia Nasionál Timor-Leste, reprezentante sosiedade sivíl hanesan Alfela, Fundasaun Alola no FOKUPERS.
Jornalista: Felicidade Ximenes
Editór: Xisto Freitas da Piedade
