VIKEKE, 26 Marsu 2025 (TATOLI)—Abitante husi aldeia Abadere, suku Babulu, postu Uatulari, munisípiu Vikeke, Gaspar Pinto Amaral, husu Governu Konstituisionál da-sia (IX) hadi’a estrada liga ba suku Babulu ne’ebé grave no difikulta populasaun sira transporta produtu lokál asesu ba merkadu.
“Ami durante ne’e preokupa liu ba estrada, hanesan agora tempu udan difikulta tebes ami. Ami atu transporta ami-nia produtu lokál ruma difisil. Tempu bailoron ne’e sente sei di’ak maibé tempu udan ne’e kondisaun dalan karreta asesu labele. Tanba ne’e, ami hakarak husu ba Governu hadi’a ona ami-nia dalan sira-ne’e husi ponte Bebui to’o suku Babulu, atu nune’e labele difikulta ami,” Gaspar Pinto Amaral hateten ba jornalista sira, iha suku Babulu, kuarta ne’e.
Nia dehan, estrada mak ligasaun importante fatin ida ba fatin seluk maibé estrada liga mai suku Babulu ne’e aat kuaze tinan barak ona seidauk hadi’a.
“Problema estrada ne’e kada tinan ami sempre hasoru difikuldade, inan-isin rua ruma atu partu, dalaruma karreta asesu mai ladi’ak. Ami atu faan ami-nia produtu mós ladi’ak, ami atu ba Vikeke trata dokumentu ruma dala ruma ami tenke la’o ain kilómetru neen no balun to’o kilómetri 10 mak sa’e karreta iha ponte Bebui. Tanba, tempu udan karreta anguna sa’e mai ami-nia suku labele, ne’ebé ami mak tenke tun ba foinsa’e karreta. Ami sente terus liu ba estrada, se bele Governu tau matan ona ami-nia estrada hodi fasilita ami-nia movimentu,” nia dehan.
Iha fatin seluk, motorista Gren max, Lourenco da Silva, haktuir agora daudaun tempu udan nune’e taransporte ba Vikeke labele ba tula pasajeru sira iha área suku Babulu tanba kondisaun estrada ladi’ak.
“Ne’ebé, ita-nia pasajeiru sira atu ba Vikeke sira tenke tun mai to’o tiha ponte Bebui mak foin ami tula sira. Tempu bailoron ne’e ami halai to’o suku Babulu, maibé agora labele. Komunidade la’o distánsia do’ok maibé sira ba trata dokumentu ruma iha Vikeke tenke tun mai, foin sa’e karreta,” nia subliña.
Xefe suku Babulu, Mario Trindade, hateten kona-ba estrada agora tempu ne’ebé kondisaun grave tebes, defikulta komunidade sira nain movimentu hanesan ba merkadu, ba trata dokumentu ruma iha munisípiu susar.
“Ami-nia estrada ne’e agora aat liu, ha’u lori motorizada atu ba munisípiu monu beibeik, tanba dalan sira-ne’e kuaze taho mak nakonu no namdoras. Kona-ba problema estrada ne’e ha’u hato’o beibeik ba ministériu relevante no sira resposta ba ami katak besik halo ona, maibé to’o agora seidauk realiza. Nune’e, nu’udar autoridade suku Babulu fó nafatin esperansa ba Governu hodi rezolve ami-nia estrada, atu povu bele asesu no sira lori sira-nia produtu lokál ba merkadu,” nia dehan.
Enkuantu, nia dehan, estrada referida la’ós asesu husi komunidade iha suku Babulu de’it maibé asesu mós husi komunidade suku Afaloikai, Uaitame, Macadike sira atu ba knu’a ne’e tenke liu husi dalan ida-ne’e.
Jornalista : Vitorino Lopes da Costa
Editór : Cancio Ximenes
