BOBONARU, 26 Marsu 2024 (TATOLI)-Autoridade Munisípiu Bobonaru, kuarta ne’e organiza enkontru urjente ho diretór servisu munisipál no administradór postu administrativu sira hodi partilla informasaun oinsá elabora Planu Asaun Anuál (PAA) ba Orsamentu Jerál Estadu tinan fiskál 2026.
Sekretáriu Autoridade Munisipál ba Asuntu Planeamentu, Semedo Laco, informa tuir orientasaun husi Ministru Administrasaun Estatál (MAE), Tomas do Rosario Carbrál, tenke hahu elabora PAA 2026 tanba data submete tarde liu iha loron 04 fulan-Abríl 2025.
Notisia Relevante:Autoridade Kovalima partilla informasaun kona-ba eloborasaun PAA 2026 ba dirijente sira
“Ita ko’alia preparasaun Planu Asaun Anuál 2026, se ita la-tau impprtansia ba ida-ne’e, tinan oin ita labele ko’alia buat barak”, nia dehan iha salaun Maria-Tapo, kuarta ne’e.
PAM Bobonaru husu ba administradór postu sira atu tau osan ba viajen lokál hodi sosializa programa governu nia, formasaun nivel baze, tau osan mos loron nasionál sira, tau osan harii postu seguransa no apoia emerjénsia ruma.
“Karik estrada aat derepenti, karreta liu la-di’ak, dalan kotu, administradór sira lalais rezolve, aluga ema ka karreta para dada-sai, labele hein husi munisípiu ho nasionál ne’e lori tempu”, katak nia.
Konaba Programa Nasionál Dezembolvimentu Suku (PNDS), Alexandre Pires, orienta atu prepara planu no orsamentu hodi halo alargamentu sede suku 50 ho osan kada obra rihun $14 inklui dapur ba merenda eskolár, jardin eskola, bee-moos no rezidensia ba profesór sira.
Diresaun Servisu Munisipál Obras Públika atu tau orsamentu ba Grande Projetu sira no orsamentu ba akizasaun makina pezadu hanesan eskavadór atu atende situasaun emerjénsia.
Diresaun Servisu Munisipál Agrikulltura, Alexandre Pires, dehan orientasaun MAE tenke tau osan ba kombustivél no manutensaun ba tratór, orsamentu operasaun ba estensionista sira no reabilitasaun irrigasaun.
Ba saúde husu tau orsamentu kombustivél ba ambulánsia multifunsaun, fumigasaun iha suku, no orsamentu ba edifísiu foun.
Diresaun Servisu Munisipál asaun sosiál atu tau osan sosa karreta funeráriu, nune’e bele koloka unidade ida kobre postu rua.
Diresaun Servisu Munisipál, PDIM atu prevee orsamentu ba konstrusaun merkadu Mau-Mali, tanba planu ne’ebé AMB trasa ba futuru fatin ne’e bele kontribui reseitas ba governu lokál.
PAM mos husu ba diresaun servisu munisipál, jestaun merkadu no tau osan ba fatin ne’ebé potensia ba turizmu hanesan bee-male no seluk-tán. Alende diresaun servisu munisipál rejistu notariadu tenke prevee osan ba ekipamentu levantamentu dadus rai no uma Estadu abandonadu.
Alaxandre Pires apela ba diresaun hotu-hotu atu tau orsamentu ne’ebé bele koresponde ba povu nia preokupasaun iha baze.
“Ha’u husu ba ita-boot sira tau orsamentu ba povu no rai ida-ne’e, la’ós ba ita nia-an, ita lori atu halo dezenvolvimentu, ha’u mak sei ba defende osan ne’e iha Komisaun Revizaun Orsamentál”, katak nia.
Enkuantu iha 2025 ne’e, autoridade Bobonaru hetan alokasaun orsamentu hamutuk $11,307,414.00, aloka ba kategoria saláriu no vensimentu $2,761,552.00, bens no servisu $1,377,833.00, tranferensia públika $5,383,247.00, kapitál menór $5000,000.00, kapitál dezenvolvimentu $1,285,782.00. Montante hirak ne’e finansia programa 16, sub-programa 35 no atividade 80 no tinan ne’e AMB hetan projetu PDIM neen.
Notísia Relevante:Autoridade Kovalima partilla informasaun kona-ba eloborasaun PAA 2026 ba dirijente sira
Jornalista : Sergio da Cruz
Editora : Rita Almeida
