KOVALIMA, 26 Marsu 2025 (TATOLI) – Benefisiáriu 500 husi postu administrativu lima munisípiu Kovalima simu ona nesesidade bázika no nesesidade Espesiál husi Prezidente Repúblika José Ramos Horta.
Atividade apoiu nesesidade bázika ne’e, Xefe Estadu Timor-Leste akompaña husi asesór polítika no membru Governu sira hodi entrega ofisiál nesesidade bázika no espesiál ba benefisiáriu sira mai husi postu administrativu sira hanesan Fatululik, Fatumea, Fohorem Suai no Maukatar.
“Atividade prinsipál mak haree situasaun no fó tulun ba família kbiit naton sira hanesan ema ho defisiente sei ba to’o iha aldeia sira”, Prezidente Repúblika José Manuel Ramos Horta, hateten ba jornalista sira, hafoin entrega nesesidade bázika iha resintu AMC, ohin.
Xefe Estadu apoia nesesidade bázika mak hanesan foos ho marka manu Vitória saku ida, mina te’in Bimoli litru lima ida, manu tolun rak ida, sapeo no seluktan.
Ho nune’e líder nasionál timoroan ne’e esplika, nia parte la’ós foin mak fó apoiu, maibé antes ne’e fó ona apoiu ba família kbiit naton sira presiza iha fatin ne’ebé de’it.
Apoia tanba konsiénsia
Tuir Konstuisaun RDTL PR labele hala’o atividade apoiu nesesidade bázika ho nune’e hetan protesta husi deputadu sira.
Iha momentu ne’e, PR Horta klarifika ba Autoridade no komunidade sira iha munisípiu Kovalima kona-ba bainhira hetan protesta husi deputadu sira bainhira fó apoiu nesesidade bázika ba família kbiit naton sira tanba konsiénsia.
“Ha’u buka apoiu la’ós husi orsamentu prezidénsia nian, maibé ha’u kolega husi Koreia no Japaun hodi fó materiàl komputadór Laptop, Sapatu no hena nune’e ha’u fahe”, nia esplika.
Benefisiáriu husi Suku Labarai, Postu Suai , Armindo de Araujo Amaral sente kontente bainhira simu nesesidade bázika no nesesidade Espesiál husi Prezidente Repúblika José Ramos Horta.
“Ami sente kontente bainhira simu nesesidade bázika husi Xefe Estadu maibé ha’u husu atu fó apoiu mós ami-nia maluk sira seluk ne’ebé mak presiza”, nia dehan.
Jornalista:Celestina Teles
Editór:Rafael Ximenes de A. Belo
