VIKEKE, 26 Marsu 2025 (TATOLI)—Organizasaun Care Timor Leste no Servisu Munisipál Agua Saneamentu no Ambiente (SMASA) Vikeke, kuarta ne’e, kuda ai-oan hamutuk 600 hodi konserva bee-matan Uaimanu, suku Babulu, postu administrativu Uatulari, hodi komemora loron mundiál bee nian ho tema “Konservasaun bee hodi haburas ekosistema”.
Diretór SMASA munisípiu Vikeke, Guilhermino Gomes Soares, hateten SMASA servisu hamutuk Care hodi kuda ai-oan iha bee-matan Uamanu atu halo konservasaun ba bee, tanba liuhusi atividade ida-ne’e oinsá enkoraja ema hotu tau importánsia ba konserva ai iha bee-matan sira.
“Nune’e, ba futuru bee labele maran hodi garante ba sustentablidade ba biodiversidade no ekosistema. Tan ne’e, SMASA servisu hamutuk ho diresaun agrikultór Vikeke hodi apoia ai-oan 600, atu ita kuda iha bee-matan no kuda iha fatin sira-ne’ebé ameasa rai halai ka erosaun. Nune’e, ba atividade ba kuda ai-oan ne’e, ita atu garante sustentablidade ba futuru nian,” Diretór SMASA munisípiu Vikeke ne’e hateten iha serimónia lansamentu kuda ai-oan iha sede suku Babulu, ohin.
Nia dehan, ema-nia nesesidade moris presiza asesu bee-moos ho kuantidade boot maibé dala barak haluha lakohi konserva ai iha bee-matan sira, loron ruma bee sei maran.
“Entaun, liuhusi atividade kuda ai-oan sira-ne’e ba iha bee-matan. Maske ita haree atividade kiik, maibé ninia impaktu boot ba iha futuru. Ho nune’e, ha’u husu autoridade lokál no komunidade sira ita hamutuk tau matan ba ai-oan sira-ne’ebé ita kuda hodi proteje ba ita-nia bee-matan,” nia hateten.
Iha biban ne’e, Sekretáriu munisípiu Vikeke, Asuntu Sosiál no Organizasaun komunitária, Acacio de Sousa, husu komunidade no autoridade sira nafatin tau matan ba bee-matan sira iha kada suku tanba bee sai importante ba ema-nian moris loro-loron komsumu bee.
“Tan ne’e, ha’u husu autoridade suku no komunidade sira konserva ita-nia bee sira iha bee-matan no komunidade sira labele tesi ai sira-ne’ebé moris besik iha bee-matan. Atu bee labele maran hodi ita bele konsumu,” nia hateten.
Iha okaziaun ne’e, xefe suku Babulu, Mario Trindade, husu agradese SMASA no Care realiza atividade komemorasaun loron mundiál bee iha suku Babubu hodi kuda ai-oan iha bee-matan Uaimanu, ne’ebé durante ne’e benifisia ba komunidade Babulu no suku Afaloikai.
“Ha’u sente orgullu tanba bele realiza atividade konservasaun kuda ai-oan iha bee-matan Uaimanu. Iha ami-nia suku bee matan hamutuk 12 maibé konservasaun ba ida de’it. Nune’e, ha’u husu ba futuru kuda mós ai-oan ba bee-matan sira-ne’ebé ita seidauk kuda ai-oan,” nia dehan.
Nia dehan, ai-oan ne’ebé kuda autoridade hamutuk ho komunidade tau matan ba ai-oan sira, hodi animál sira labele estraga, atu proteje no konserva ba bee-matan.
Enkuantu ai-oan ne’ebé kuda iha bee-matan Uaimanu ne’e kompostu husi ai-oan Kiara, ai-mahoni, ai-Saria, ai-kakeu no ai-tou ho totál 600 kuda ona iha bee-matan.
Partisipa kuda ai-oan ba komemerasaun loron mundiál bee hetan partisipa husi autoridade lokál, veteranu, Polísia Nasionál Timor Leste (PNTL) eskuadra Uatulari, xefe sentru saúde, funsionáriu SMASA, Floresta Vikeke, Care, komunidade suku Babulu no suku Afaloikai.
Jornalista : Vitorino Lopes da Costa
Editór : Cancio Ximenes
