DILI, 26 Marsu 2025 (TATOLI) – Konselu Ministru aprova dekretu-lei ne’ebé estabelese regra tranzisaun ba situasaun rezerva no reforma ba militár veteranu sira FALINTIL-Forsa Defeza Timor-Leste (F-FDTL) nian.
Projetu dekretu-lei ne’e aprezenta husi Ministru Defeza, Donaciano do Rosário Gomes.
Tuir nota husi Governu ne’ebé TATOLI asesu, lei ne’e sei vigora iha loron 31 fulan-Dezembru 2025, prevee tranzisaun ba situasaun rezerva ba pesoál militár veteranu sira ne’ebé atinji limite idade ne’ebé prevee ona ba idaidak nia pozisaun, nomós tranzisaun ba reforma ba sira ne’ebé sei ativu hela no atinji ona idade 60.
Dekretu ne’e mós estabelese atribuisaun subsídiu ai-han fulan-fulan ho dólar 300 ba veteranu militár reformadu sira F-FDTL nian, hodi garante prosesu reforma ida ne’ebé justu no dignu.
“Montante ida-ne’e sei kumulativu ho pensaun reforma ne’ebé fó husi rejime jerál seguransa sosiál nian”, nota esplika.
Jornalista: Arminda Fonseca
Editora: Maria Auxiliadora
